ബെയ്ജിങ്: കൊറോണ വൈറസിന്റെ ഉത്ഭവകേന്ദ്രമായ വുഹാനിലടക്കം നിയന്ത്രണങ്ങളില്‍ ഇളവ് വരുത്തിയിരുന്ന ചൈന, തീരുമാനം മാറ്റാന്‍ ഒരുങ്ങുന്നതായി സൂചന. 

രാജ്യത്ത് വീണ്ടും കൊവിഡ് കേസുകള്‍ റിപ്പോര്‍ട്ട് ചെയ്തതോടെയാണിത്. നിയന്ത്രണങ്ങളില്‍ ഇളവ് വരുത്തിയത് നേരത്തേയായെന്നാണ് ചൈനീസ് ആരോഗ്യവകുപ്പിന്റെ വിലയിരുത്തല്‍. നിയന്ത്രണങ്ങളില്‍ നേരത്തെ ഇളവ് വരുത്തിയതിന്റെ അര്‍ഥം നിയന്ത്രണങ്ങള്‍ ഒഴിവാക്കി എന്നല്ലെന്നും ഇന്നലെ ചൈനീസ് ആരോഗ്യമന്ത്രാലയം വ്യക്തമാക്കി. കഴിഞ്ഞ ദിവസം വുഹാനിലടക്കം ചൈനയിലെ വിവിധ പ്രദേശങ്ങളില്‍ വീണ്ടും കൊവിഡ് കേസുകള്‍ റിപ്പോര്‍ട്ട് ചെയ്തിരുന്നു. കൊവിഡ് നിയന്ത്രണത്തിലായെന്നു ചൈന പ്രഖ്യാപിച്ചതിനു ശേഷം വിദേശത്തുനിന്ന് എത്തിയവര്‍ക്ക് മാത്രമായിരുന്നു രോഗം സ്ഥിരീകരിച്ചിരുന്നത്. എന്നാല്‍ കഴിഞ്ഞ ദിവസങ്ങളില്‍ സ്വദേശികള്‍ക്കും രോഗം സ്ഥിരീകരിച്ചതോടെ ചൈന ജാഗ്രതയിലാണ്. വുഹാനിലെയടക്കം സ്‌കൂളുകള്‍ തുറക്കുകവരെ ചെയ്തതിനു ശേഷമാണ് ചൈനയില്‍ വീണ്ടും രോഗം റിപ്പോര്‍ട്ട് ചെയ്യുന്നത്.

ദക്ഷിണ കൊറിയ, ഇറാന്‍, ജര്‍മനി തുടങ്ങിയ രാജ്യങ്ങളും നിയന്ത്രണങ്ങള്‍ പിന്‍വലിച്ച ശേഷം വീണ്ടും നിയന്ത്രണങ്ങള്‍ പ്രഖ്യാപിച്ച് രംഗത്തെത്തിയിരുന്നു. ദക്ഷിണ കൊറിയയിലെ സിയോളില്‍ ക്ലബുകളിലും ബാറുകളിലും നിശാപാര്‍ട്ടികളിലും എത്തിയവരില്‍ നൂറിലേറെ പേര്‍ക്കു കഴിഞ്ഞ ദിവസം കൊവിഡ് സ്ഥിരീകരിച്ചിരുന്നു. ഇതോടെ, ഇവയുടെയെല്ലാം പ്രവര്‍ത്തനം സര്‍ക്കാര്‍ നിര്‍ത്തിവയ്പിച്ചിരുന്നു.