പേരാമ്പ്ര: ചക്കിട്ടപാറ ഗ്രാമപഞ്ചായത്തിലെ പൂഴിത്തോട് കരിങ്കണ്ണിയില്‍ 20 വയസ് മതിക്കുന്ന പിടിയാനയുടെ ജഡം കണ്ടെത്തി.
 കാടിനുള്ളിലെ വഴിയില്‍ കിടക്കുകയായിരുന്ന ജഡത്തിനു രണ്ടുദിവസത്തെ പഴക്കമുണ്ട്. ആനയുടെ ജഡത്തില്‍ പരുക്കുകളുണ്ട്. പുറകിലെ ഇടതുകാലിന്റെ എല്ല് പൊട്ടിയ നിലയിലാണ്. കാട്ടാനകള്‍ തമ്മിലുണ്ടായ ഏറ്റുമുട്ടലാണ് ചരിയാന്‍ കാരണമെന്നാണ് പ്രാഥമിക നിഗമനം.മേഖലയിലെ ഏക താമസക്കാരന്‍ മര്‍ക്കോസാണ് ഇതിനെ കണ്ടെത്തിയത്. പൂഴിത്തോട് ഫോറസ്റ്റ് സെക്ഷന്‍ ഓഫിസില്‍ കിലോമീറ്ററുകള്‍ നടന്നാണ് ഇദ്ദേഹം വിവരമറിയിച്ചത്.
പെരുവണ്ണാമൂഴി ഫോറസ്റ്റ് റെയിഞ്ചര്‍ ബി.ആര്‍ റൂബിന്‍, ഫോറസ്റ്റര്‍ ദിദീഷ്, സെക്ഷന്‍ ഫോറസ്റ്റ് ഓഫിസര്‍ രമേശന്‍ എന്നിവരുടെ നേതൃത്വത്തില്‍ വനപാലകരെത്തി മേല്‍നടപടികള്‍ സ്വീകരിച്ചു. മരുതോങ്കര വെറ്ററിനറി സര്‍ജന്‍ ടി. രജിത്ത് പോസ്റ്റ്‌മോര്‍ട്ടം നടത്തി. പോസ്റ്റ്‌മോര്‍ട്ടം നടപടികള്‍ക്കുശേഷം സമീപത്തുതന്നെ സംസ്‌കരിച്ചു.