നാദാപുരം:  നിരാഹാരം അവസാനിപ്പിച്ച ശേഷം ഡോക്ടര്‍മാരുടെ നിര്‍ദേശ പ്രകാരം കഴിഞ്ഞ ദിവസം രാത്രി ആശുപത്രിയില്‍ പ്രവേശിപ്പിച്ച ജിഷ്ണുവിന്റെ സഹോദരി അവിഷ്ണ വീട്ടില്‍ തിരിച്ചെത്തി.
ശരീരത്തില്‍ ജലാംശം കുറഞ്ഞതിനാല്‍ വൃക്കയുടെ പ്രവര്‍ത്തനത്തെ ബാധിച്ചേക്കുമെന്നു വീട്ടില്‍വച്ച് അവിഷ്ണയെ ചികിത്സിച്ച മെഡിക്കല്‍ കോളജില്‍നിന്നെത്തിയ ഡോക്ടര്‍മാര്‍ സംശയം പ്രകടിപ്പിച്ചിരുന്നു. എന്നാല്‍ ഇന്നലെ ആശുപത്രിയിലെ പരിശോധനയില്‍ കുഴപ്പമൊന്നും കണ്ടെത്തിയിട്ടില്ല. ഇതേതുടര്‍ന്ന് ഉച്ചയോടെ ആശുപത്രിയില്‍നിന്നും ഡിസ് ചാര്‍ജ് ചെയ്യുകയായിരുന്നു. ദ്രവ രൂപത്തിലുള്ള ഭക്ഷണം മാത്രമാണ് ഡോക്ടര്‍മാര്‍ ഇപ്പോള്‍ ശുപാര്‍ശ ചെയ്തിരിക്കുന്നത്.  അമ്മ മഹിജ ഇപ്പോഴും തിരുവനന്തപുരം മെഡിക്കല്‍ കൊളജില്‍ തീവ്രപരിചരണ വിഭാഗത്തില്‍ കിടക്കുന്നതാണ് അവിഷ്ണയെ അസ്വസ്ഥമാക്കുന്നത്.
സമരം വിജയിച്ചതിലുള്ള സന്തോഷവും അവിഷ്ണ പങ്കുവച്ചു. സമരത്തിന്റെ വിജയത്തിനു സഹകരിച്ച എല്ലാവര്‍ക്കും  അവിഷ്ണ പ്രത്യേകം നന്ദി പറഞ്ഞു.