#വിനയന്‍ പിലിക്കോട് 

ചെറുവത്തൂര്‍: എല്‍.പി സ്‌കൂളില്‍ പഠിക്കുമ്പോള്‍ ഭാവിയില്‍ ആരാകണമെന്ന അധ്യാപകരുടെ ചോദ്യത്തിന് ഡോക്ടര്‍ ആകണമെന്ന് മറുപടി പറഞ്ഞ ഏഴു ചങ്ങാതിമാര്‍. ഒടുവില്‍ ആഗ്രഹം സഫലീകരിച്ചു, എല്ലാവരും ഡോക്ടര്‍മാരായി. സര്‍ക്കാര്‍ വിദ്യാലയങ്ങളില്‍ പഠിച്ച് ഡോക്ടര്‍മാരാകാന്‍ കഴിഞ്ഞതിന്റെ സന്തോഷത്തിലാണ് കെ.പി നീതു, അര്‍ഷ കാര്യത്ത്, കെ.പി കാവ്യ, കെ.വി അശ്വനി, ഷാതി തമ്പാന്‍, എം. അഞ്ജലി, അപര്‍ണ എന്നിവര്‍.

ആതുരശുശ്രൂഷാ രംഗത്തേക്കു കടന്ന ഇവരില്‍ അഞ്ചുപേര്‍ തങ്ങള്‍ ബാലപാഠം നുകര്‍ന്ന പിലിക്കോട് വയല്‍ ഗവ. വെല്‍ഫെയര്‍ എല്‍.പി സ്‌കൂള്‍ മുറ്റത്ത് ഒത്തുചേര്‍ന്നു. അഞ്ജലിയും അപര്‍ണയും തിരക്കുകള്‍ കാരണം എത്തിയില്ല. കര്‍ഷകരും തൊഴിലാളികളും ധാരാളമുള്ള ഗ്രാമപ്രദേശമാണ് വയല്‍. പ്രദേശത്തെ കുട്ടികളുടെ സ്വപ്നങ്ങള്‍ക്ക് അധ്യാപകരും രക്ഷിതാക്കളും നാട്ടുകാരുമെല്ലാമാണ് നിറം പകര്‍ന്നത്. ഏതാണ്ട് അരക്കിലോമീറ്റര്‍ ചുറ്റളവില്‍ ഏഴു ഡോക്ടര്‍മാരുടെ ബോര്‍ഡുകള്‍ നാടിന് ഇന്ന് അഭിമാനത്തിന്റെ അടയാളമാകും. പ്രദേശത്തെ മെഡിക്കല്‍ ക്യാംപുകളിലും മറ്റും സജീവമായി ഈ ചങ്ങാതിക്കൂട്ടത്തിന്റെ സാന്നിധ്യമുണ്ട്.

എം. മാധവന്‍-തങ്കമണി ദമ്പതികളുടെ മകളായ നീതു കര്‍ണാടക ആയുര്‍വേദ കോളജില്‍ നിന്നാണ് പഠനം പൂര്‍ത്തിയാക്കിയത്. അര്‍ഷ കാര്യത്തും ഇവിടെ തന്നെ മെഡിക്കല്‍ പഠനം പൂര്‍ത്തിയാക്കി. അനിതയുടെയും കുമാരന്റെയും മകളാണ്. അപര്‍ണ മംഗളുരു മൂഡബിദ്രി ആല്‍വാസ് ആയുര്‍വേദ മെഡിക്കല്‍ കോളജിലാണ് പഠിച്ചത്. എ.വി രാജന്‍-ഗീത ദമ്പതികളുടെ മകളാണ്.

കാവ്യ ദന്തല്‍ ഡോക്ടറാണ്. തിരുവനന്തപുരം ശ്രീ ശങ്കര ദന്തല്‍ കോളജിലായിരുന്നു പഠനം. എം. ചന്ദ്രന്‍-സോന എന്നിവരുടെ മകള്‍. ഇവര്‍ നാലുപേരും പ്രൈമറി തലത്തില്‍ ഒരേ ബെഞ്ചിലിരുന്നു പഠിച്ചവരാണ്. ഹോമിയോ മേഖലയിലാണ് അടുത്ത ഡോക്ടറായ അശ്വിനി. കെ.വി മംഗളുരു മൂഡബിദ്രി ആല്‍വാസ് ഹോമിയോപതിക് മെഡിക്കല്‍ കോളജില്‍ പഠനം പൂര്‍ത്തിയാക്കി. കെ.വി ശശിധരന്റെയും പുഷ്പവല്ലിയുടെയും മകളാണ്.
ഷാതി തമ്പാന്‍ കര്‍ണാടക നാച്ചറോപ്പതി ആന്‍ഡ് യോഗിക് സയന്‍സസ് കോളജില്‍ നിന്നാണ് പഠനം പൂര്‍ത്തിയാക്കിയത്. പൂവട്ട തമ്പാന്‍-ഷര്‍മിള ദമ്പതികളുടെ മകളാണ്. അഞ്ജലി എം.ബി.ബി.എസിന് മെറിറ്റ് സീറ്റില്‍ പ്രവേശനം നേടി തമിഴ് നാട് ഗവ. വില്ലൂപുരം മെഡിക്കല്‍ കോളജില്‍ പഠനം പൂര്‍ത്തിയാക്കി.
കെ.വി തമ്പാന്റെയും കല്യാണിയുടെയും മകളാണ്. പ്രദേശത്തുകാര്‍ക്ക് ഡോക്ടര്‍മാരെ തേടി ഇനി ദൂരസ്ഥലങ്ങളിലേക്ക് പോകേണ്ട. തൊട്ടടുത്തായി ഇവര്‍ ഏഴു പേരുണ്ട്. സാമ്പത്തിക പരാധീനതകള്‍ ഉള്‍പ്പെടെ മറികടന്ന് കൂട്ടുകാര്‍ മനസിലുറപ്പിച്ച ലക്ഷ്യം കീഴടക്കിയതില്‍ നാട് വലിയ ആഹ്ലാദത്തിലാണ്.