കൊച്ചി: അര്‍ഹതപ്പെട്ട അവകാശങ്ങളും ആനുകൂല്യങ്ങളും നേടിയെടുക്കാന്‍ തീരദേശ വാസികള്‍ തുടര്‍ച്ചയായ പ്രക്ഷോഭം നടത്തണമെന്ന് പരിസ്ഥിതി ശാസ്ത്രജ്ഞന്‍ ഡോ. മാധവ് ഗാഡ്ഗില്‍. കൊച്ചിയില്‍ നടത്തിയ 'തീരദേശ പരിപാലന വിജ്ഞാപനം: 2019 ഉയര്‍ത്തുന്ന വെല്ലുവിളികള്‍' എന്ന വിഷയത്തില്‍ സംഘടിപ്പിച്ച കണ്‍വെന്‍ഷന്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മത്സ്യത്തൊഴിലാളികള്‍ തങ്ങളുടെ അവകാശങ്ങള്‍ നേടിയെടുക്കുക തന്നെ വേണം. അതിന് ചെറിയ സമര രീതികള്‍ മാത്രം നടത്തിയാല്‍ മതിയാകില്ലന്നും തുടര്‍ച്ചയായ സമരപ്രക്ഷോഭങ്ങള്‍ നടത്തിയാല്‍ മാത്രമേ നിഷേധിച്ച അവകാശങ്ങളും ആനുകൂല്യങ്ങളും നേടിയെടുക്കാന്‍ സാധിക്കൂ എന്നും അദ്ദേഹം പറഞ്ഞു.
വനത്തെ ആശ്രയിച്ചു കഴിയുന്ന ജനവിഭാഗങ്ങളെ സംരക്ഷണ ചുമതല ഏല്‍പ്പിച്ചപ്പോള്‍ ചൂഷണം ഒഴിവാകുകയും വിഭവങ്ങള്‍ വര്‍ധിക്കുകയും ചെയ്തിട്ടുണ്ട്. കടല്‍ സമ്പത്ത് ആശ്രയിച്ചു കഴിയുന്ന തീരദേശവാസികളെ സംരക്ഷണച്ചുമതല ഏല്‍പ്പിച്ചാല്‍ ഇതേ അനുഭവം ഉണ്ടാകുമെന്നും അദ്ദേഹം പറഞ്ഞു. മുംബൈയില്‍ പുഴയുടെ തീരത്ത് സ്ഥാപിച്ച കെമിക്കല്‍ ഫാക്ടറിക്കെതിരെ പ്രക്ഷോഭമുയര്‍ന്നപ്പോള്‍ 11,000 പേര്‍ക്ക് തൊഴില്‍ ലഭ്യമായി എന്ന മറുപടിയാണ് അധികൃതരില്‍നിന്നുണ്ടായത്. എന്നാല്‍ മത്സ്യബന്ധനം ഉപജീവനമാര്‍ഗമാക്കിയ 20,000 കുടുംബങ്ങള്‍ക്കാണ് അതോടെ ഉപജീവനമാര്‍ഗം ഇല്ലാതായത്. ഇതുപോലുള്ള യാഥാര്‍ഥ്യം എല്ലാരും മൂടിവെക്കുകയാണെന്നും അദ്ദേഹം പറഞ്ഞു.

ഡോ. ബി മധുസൂദനപ്പണിക്കര്‍, ഡോ. കെ.വി തോമസ്, വി.എസ് വിജയന്‍, ഹൈബി ഈഡന്‍ എം.എല്‍.എ, ടി.ജെ ആഞ്ചലോസ്, അഡ്വ. കെ.കെ രാധാകൃഷ്ണന്‍ എന്നിവര്‍ സംസാരിച്ചു. ജനറല്‍ കണ്‍വീനര്‍ ചാള്‍സ് ജോര്‍ജ് സ്വാഗതവും ടി. രഘുവരന്‍ കൃതജ്ഞതയും പറഞ്ഞു.