തിരുവനന്തപുരം: നെഹ്‌റു കോളജ് വിദ്യാര്‍ഥി ജിഷ്ണു പ്രണോയി മരിച്ച സംഭവത്തില്‍ പരാതി ബോധിപ്പിക്കാന്‍ അമ്മ മഹിജയ്ക്ക് മുഖ്യമന്ത്രി പിണറായി വിജയനെ കാണാന്‍ അനുമതി നല്‍കി. ഈ മാസം 15 നാണ് കൂടിക്കാഴ്ചയ്ക്ക് അനുമതി നല്‍കിയത്.

അതേസമയം, സമരം അവസാനിപ്പിക്കാന്‍ സര്‍ക്കാരുമായുണ്ടാക്കിയ കരാറിന്റെ പകര്‍പ്പ് ജിഷ്ണുവിന്റെ കുടുംബത്തിന് കൈമാറിയെന്ന് മുഖ്യമന്ത്രിയുടെ ഓഫിസ് അറിയിച്ചു.

മഹിജയോടൊപ്പം ആര്‍ക്കൊക്കെ മുഖ്യമന്ത്രിയെ കാണാമെന്ന് വ്യക്തമാക്കുന്നില്ല. അമ്മാവന്‍ ശ്രീജിത്തിനെ കൂടിക്കാഴ്ചയ്ക്ക് അനുമതി നല്‍കുമോയെന്നും വ്യക്തമല്ല.

അതേസമയം, ഡി.ജി.പി ഓഫിസിനു മുന്നില്‍ നടന്ന സംഭവത്തില്‍ അന്വേഷണ സംഘം മഹിജയുടെ മൊഴിയെടുത്തു. എ.ഡി.ജി.പി നിതിന്‍ അഗര്‍വാളിന്റെ നേതൃത്വത്തിലുള്ള സംഘം തിരുവനന്തപുരം മെഡിക്കല്‍ കോളജിലെത്തിയാണ് മൊഴിയെടുത്തത്.