ബംഗളൂരു: ക്വാറന്റൈനെതിരേ പ്രതിഷേധിച്ചതിനെ തുടര്‍ന്ന് ബംഗളൂരുവിലെത്തിയ 19 യാത്രക്കാരെ റെയില്‍വേ ഡല്‍ഹിയിലേക്ക് തിരിച്ചയച്ചു. വ്യാഴാഴ്ച പുലര്‍ച്ചെ ബംഗളൂരുവിലെത്തിയ ഡല്‍ഹി-കെ.എസ്.ആര്‍ ബംഗളൂരു ട്രെയിനിലെ യാത്രക്കാരാണിവര്‍. വ്യാഴാഴ്ച ഡല്‍ഹിയിലേക്കു പോയ ഒരു ട്രെയിനില്‍ അധിക കോച്ച് ചേര്‍ത്ത് അതിലാണ് ഇവരെ തിരിച്ചയച്ചതെന്ന് റെയില്‍വേ അറിയിച്ചു.
140 യാത്രക്കാരാണ് ആദ്യം ക്വാരന്റൈനില്‍ പോവാന്‍ തയാറല്ലെന്നു പറഞ്ഞ് പ്രതിഷേധിച്ചത്. എന്നാല്‍ ഉന്നത സര്‍ക്കാര്‍ ഉദ്യോഗസ്ഥര്‍ സ്ഥലത്തെത്തി പ്രതിഷേധക്കാരുമായി ചര്‍ച്ച നടത്തിയതോടെ ഭൂരിപക്ഷം പേരും ക്വാരന്റൈനിനു തയാറായി. എന്നാല്‍ ഒരുതരത്തിലും സമ്മതിക്കാതിരുന്ന 19 പേരെയാണ് തിരിച്ചയച്ചതെന്ന് റെയില്‍വേ ഉദ്യോഗസ്ഥന്‍ പറഞ്ഞു.