തൊഴിലാളികളെ കസ്റ്റഡിയിലെടുത്ത് ഡല്‍ഹി പൊലിസ് 

ന്യൂഡല്‍ഹി: ജോലിയില്ലാതെയും ഭക്ഷണം ലഭിക്കാതെയും നാട്ടിലേക്ക് പലായനംചെയ്യുന്ന കുടിയേറ്റത്തൊഴിലാളികളുമായി സംസാരിച്ചും അവര്‍ക്ക് നാട്ടിലെത്താനുള്ള വാഹന സൗകര്യമേര്‍പ്പെടുത്തിയും കോണ്‍ഗ്രസ് നേതാവ് രാഹുല്‍ ഗാന്ധി. 

ഇന്നലെ ഡല്‍ഹി സുഖ്‌ദേവ് വിഹാറിലെ ഫ്‌ളൈ ഓവറിനടുത്താണ് രാഹുല്‍ കുടിയേറ്റത്തൊഴിലാളികളുമായി സംസാരിക്കാനെത്തിയത്. ഇതിനു പിന്നാലെ രാഹുലുമായി സംസാരിച്ച തൊഴിലാളികളില്‍ ചിലരെ ഡല്‍ഹി പോലിസ് കസ്റ്റഡിയിലെടുക്കുത്തു. 

ഹരിയാനയില്‍ നിന്ന് ഉത്തര്‍പ്രദേശ്, മധ്യപ്രദേശ് എന്നീ സംസ്ഥാനങ്ങളിലേക്ക് നടന്നുകൊണ്ടിരിക്കുന്ന കുടിയേറ്റത്തൊഴിലാളികള്‍ വിശ്രമിക്കുന്നിടത്തേക്കാണ് രാഹുല്‍ പൊടുന്നനെയെത്തിയത്. കുടിയേറ്റത്തൊഴിലാളികളില്‍ ചിലര്‍ക്ക് രാഹുല്‍ വാഹന സൗകര്യമൊരുക്കുകയും മറ്റു സഹായങ്ങള്‍ നല്‍കുകയും ചെയ്തു. 'രാഹുല്‍ ഗാന്ധി ഞങ്ങളെ കാണാന്‍ വന്നിരുന്നു. നമ്മുടെ ബുദ്ധിമുട്ടുകള്‍ എല്ലാം അദ്ദേഹം ചോദിച്ചു മനസിലാക്കി. ഞങ്ങള്‍ക്ക് ഭക്ഷണം ലഭിക്കുന്നില്ലെന്ന് അദ്ദേഹത്തോട് പറഞ്ഞു. 50 ദിവസത്തോളമായി ജോലിയില്ല. എല്ലാത്തിനും പരിഹാരം കാണാന്‍ എന്തെങ്കിലും ചെയ്യുമെന്ന് അദ്ദേഹം ഉറപ്പുനല്‍കി. ആരെങ്കിലും ഞങ്ങളെ കാണാന്‍ എത്തിയതില്‍ അതീവ സന്തോഷം. പറയുന്നത് കേള്‍ക്കാനെങ്കിലും ആളുണ്ടായല്ലോ' മഹേഷ്‌കുമാര്‍ എന്ന തൊഴിലാളി വാര്‍ത്താ ഏജന്‍സിയോട് പറഞ്ഞു.  രാഹുല്‍ തങ്ങള്‍ക്ക് നാട്ടിലേക്ക് പോകാന്‍ വാഹനം ബുക്ക് ചെയ്തു തന്നതായും ഭക്ഷണവും വെള്ളവും തന്നുവെന്നും മറ്റൊരു കുടിയേറ്റത്തൊഴിലാളി പറഞ്ഞു. 

രാഹുല്‍ സംസാരിച്ചതിന് പിന്നാലെയാണ് പോലിസെത്തി അവരില്‍ ചിലരെ കസ്റ്റഡിയിലെടുത്തത്. ഇവരെ തടവില്‍ പാര്‍പ്പിച്ചതായി കോണ്‍ഗ്രസ് ആരോപിച്ചു. ഹരിയാനയിലെ അംബാലയില്‍ നിന്ന് ഉത്തര്‍പ്രദേശിലെ ഝാന്‍സിയിലേക്ക് നടക്കുകയായിരുന്ന ഒരു കൂട്ടം തൊഴിലാളികളെയാണ് ഡല്‍ഹി പൊലിസ് കസ്റ്റഡിയിലെടുത്തത്. എന്നാല്‍ ഡല്‍ഹി പൊലിസ് ഇത് നിഷേധിച്ചു.