ന്യൂഡല്‍ഹി: പശുക്കളുടെ സംരക്ഷണത്തിനായി നെട്ടോടമോടുന്നവര്‍ രാജ്യത്തെ സ്ത്രീകളുടെ സുരക്ഷയെ കുറിച്ച് മൗനം പാലിക്കുന്നുവെന്ന് രാജ്യസഭാ എം.പി ജയാ ബച്ചന്‍.

മമതാ ബാനര്‍ജിയുടെ തലയ്ക്ക് 11 ലക്ഷമെന്ന ബി.ജെ.പി നേതാവിന്റെ പ്രഖ്യാപനം ചൂണ്ടിക്കാട്ടിയാണ് സമാജ് വാദി പാര്‍ട്ടി എം.പി ജയ ബച്ചന്റെ പ്രതികരണം.

എങ്ങനെയാണ് ഒരാള്‍ക്ക് ഒരു സ്ത്രീയെ കുറിച്ച് ഇത്ര മോശമായി സംസാരിക്കാനാവുക. ഇതാണു നിങ്ങള്‍ രാജ്യത്തെ സ്ത്രീകള്‍ക്ക് നല്‍കുന്ന സുരക്ഷ. ഇത്തരം നീക്കങ്ങള്‍ കൊണ്ടാണ് സ്ത്രീകള്‍ക്ക് അരക്ഷിതാവസ്ഥ അനുഭവപ്പെടുന്നതെന്നും അവര്‍ പറഞ്ഞു.

അതേസമയം സ്ത്രീയായ താന്‍ അക്രമിക്കപ്പെട്ടതിന് മമതയുടെ പക്കല്‍ വല്ല വിശദീകരണവുമുണ്ടോ എന്ന് ബി.ജെ.പിയുടെ എം.പി രൂപ ഗാംഗുലി തിരിച്ചടിച്ചു.

ബംഗാള്‍ മുഖ്യമന്തി മമത ബാനര്‍ജിയുടെ തലകൊയ്യുന്നവര്‍ക്ക് പതിനൊന്ന് ലക്ഷം നല്‍കുമെന്ന് ബംഗാള്‍ ബി.ജെ.പി യുവജനനേതാവ് യോഗേഷ് വര്‍ഷ്‌നി പ്രഖ്യാപിച്ചിരുന്നു. ഹനുമാന്‍ ജയന്തി ദിനത്തില്‍ ബിര്‍ബൂം ജില്ലയില്‍ നടത്തിയ റാലിക്കെതിരെ ലാത്തിച്ചാര്‍ജ് നടത്തിയതില്‍ പ്രതിഷേധിച്ചായിരുന്നു യോഗേഷിന്റെ പ്രതികരണം.