റിയാദ്: റിയാദ് അന്താരാഷ്ട്ര പുസ്തകമേളയില്‍ സൗദിയിലെ മുന്‍ നിര പ്രസാധകരായ മദാരിക് പ്രിന്റിംഗ് ആന്റ് പബ്ലിഷിംഗ് കമ്പനി പ്രസിദ്ധീകരിച്ച എം.ടി വാസുദേവന്‍ നായരുടെ നോവലായ നാലുകെട്ടിന്റെ അറബിക് വിവര്‍ത്തനം പ്രകാശനം ചെയ്യും.

ഇംഗ്ലീഷ് ഉള്‍പ്പെടെ പതിനാല് ലോക ഭാഷകളിലേക്ക് വിവര്‍ത്തനം ചെയ്യപ്പെട്ട നാലുകെട്ടിന്റെ അറബി വിവര്‍ത്തനം തയാറാക്കിയത് അബൂദാബി ജുഡീഷ്യല്‍ ഡിപ്പാര്‍ട്ട്‌മെന്റിന്റെ കീഴില്‍ കോടതികളില്‍ ബഹുഭാഷാ പരിഭാഷകനായി ജോലി ചെയ്യുന്ന മുസ്തഫ വാഫി കാട്ടുമുണ്ടയും അനസ് വാഫി കാളികാവും സംയുക്തമായാണ് .ഹൈദരാബാദ് സെന്‍ട്രല്‍ യൂണിവേഴ്‌സിറ്റിയില്‍ നിന്ന് സാമൂഹിക ശാസ്ത്രത്തില്‍ ബിരുദാനന്തര ബിരുദം നേടിയ അനസ് വാഫി കണ്ണൂര്‍ അഴിയൂര്‍ ജുമാ മസ്ജിദിലാണ് ജോലി ചെയ്യുന്നത്.

തകഴിയുടെ ചെമ്മീനിനും ബെന്യാമിന്റെ അടുജീവിതത്തിനും ശേഷം മൂല കൃതിയില്‍ നിന്ന് നേരിട്ട് അറബിയിലേക്ക് മൊഴിമാറ്റപ്പെടുന്ന മലയാള നോവലാണ് നാലുകെട്ട്. വിവിധ രാജ്യങ്ങളെയും ഭാഷകളെയും സംസ്‌കാരങ്ങളെയും പ്രതിനിധീകരിക്കുന്ന വ്യത്യസ്ത കലാ സാംസ്‌കാരിക പരിപാടികളും റിയാദ് പുസ്തക മേളയുടെ ഭാഗമായി ഒരുക്കിയിട്ടുണ്ട്. അറബി, ഇംഗ്ലീഷ്, ഫ്രഞ്ച്, തുര്‍ക്കി തുടങ്ങിയ ഭാഷകളില്‍ സാഹിത്യ ചര്‍ച്ചകളും നടക്കും. മേള മാര്‍ച്ച് 23 ന് സമാപിക്കും.