ഹരിപ്പാട്: എട്ടാം ക്ലാസ് വിദ്യാര്‍ത്ഥിനിയുടെ ദേഹത്ത് കയറി പിടിച്ചെന്ന പരാതിയില്‍ കോളേജ് ലാബ് അസിസ്റ്റന്റിനെ പോലീസ് അറസ്റ്റ് ചെയ്തു.
ഹരിപ്പാട് ജുഡീഷ്യല്‍ ഒന്നാം ക്ലാസ് കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.ചെങ്ങന്നൂര്‍ ആലാ എസ്.എന്‍ കോളേജ് ലാബ് അസിസ്റ്റന്റ് നങ്ങ്യാര്‍കുളങ്ങര അകംകുടി കൊല്ലശ്ശേരില്‍ പ്രകാശനാണ് (42) റിമാന്റിലായത്. സൈക്കിളില്‍ സഞ്ചരിച്ചിരുന്ന പെണ്‍കുട്ടികളിലൊരാളെ പിന്നാലെ ബൈക്കില്‍ വന്ന ഇയാള്‍ വട്ടം വച്ച് കയറി പിടിച്ചെന്നും ഭയന്നു പോയ കുട്ടി ആരോടും മിണ്ടാതെയും ആഹാരം കഴിക്കാതെയും ഇരിക്കുന്നത് ശ്രദ്ധിച്ച മാതാവ് വിശദമായി അന്വേഷിച്ചപ്പോഴാണ് വിവരങ്ങള്‍ കുട്ടിയില്‍ നിന്നറിഞ്ഞത്. കൂട്ടത്തിലുണ്ടായിരുന്ന കുട്ടികളിലൊരാള്‍ ഇയാളുടെ ബൈക്കിന്റെ നമ്പര്‍ കുറിച്ചെടുത്തിരുന്നു.തുടര്‍ന്ന് മാതാവ് ഹരിപ്പാട് പോലീസില്‍ നല്കിയ പരാതിയെ തുടര്‍ന്ന് വണ്ടി നമ്പര്‍ വച്ച് നടത്തിയ അന്വേഷണത്തില്‍ ഹരിപ്പാട് സര്‍ക്കിള്‍ ഇന്‍സ്‌പെക്ടര്‍ റ്റി. മനോജിന്റെ നേതൃത്വത്തില്‍ പ്രതിയെ അറസ്റ്റ് ചെയ്യുകയായിരുന്നു.