തിരുവനന്തപുരം: ചാല മാര്‍ക്കറ്റിലും പരിസര പ്രദേശങ്ങളിലും കഞ്ചാവ് വില്‍പ്പന നടത്തി വന്നിരുന്ന കുപ്രസിദ്ധ കഞ്ചാവ് വില്‍പ്പനക്കാരനെയും കൂട്ടാളിയെയും രണ്ട് കിലോ കഞ്ചാവുമായി സിറ്റി ഷാഡോ പൊലിസ് പിടികൂടി. പറണ്ടോട്, ലക്ഷം വീട്ടില്‍ നാസര്‍ (38), മുട്ടത്തറ പുതുവല്‍പുത്തന്‍ വീട്ടില്‍ രാജന്‍ (49) എന്നിവരെയാണ് കരമന പൊലിസ് അറസ്റ്റ് ചെയ്തത്.
തമിഴ്‌നാട്ടിലെ കുപ്രസിദ്ധ കഞ്ചാവ് വില്‍പ്പന കേന്ദ്രങ്ങളായ തേനി, കമ്പം എന്നിവിടങ്ങളില്‍ നിന്നും കിലോക്കണക്കിന് കഞ്ചാവ് ബസില്‍ മാറി മാറിക്കയറി അതിസമര്‍ത്ഥമായി കടത്തി ക്കൊണ്ട് വന്ന് ഇവരുടെ രഹസ്യ കേന്ദ്രങ്ങളിലെത്തിച്ച് അഞ്ഞൂറ്, ഇരുന്നൂറ്, നൂറ് രൂപയുടെ ചെറു പൊതികളാക്കിയാണ് ഈ സംഘം വിറ്റിരുന്നത്. നഗരത്തില്‍ സിറ്റി ഷാഡോ പൊലിസ് നിരന്തരം നടത്തി വരുന്ന കഞ്ചാവ് വേട്ടയെ തുടര്‍ന്ന് പിടിക്കപ്പെടാതിരിക്കാന്‍ പരിചയമുള്ളവര്‍ക്ക് മാത്രമാണ് ഇവര്‍ കഞ്ചാവ് വില്‍പ്പന നടത്തിയിരുന്നത്. ഇത്തരത്തില്‍ ഇവരില്‍ നിന്നും കഞ്ചാവ് വാങ്ങിയിരുന്നവരെ സ്ഥിരമായി നിരിക്ഷിച്ച ഷാഡോ പൊലിസ് സംഘം, നാസര്‍ കഞ്ചാവ് കടത്തുന്ന രീതികള്‍ മനസിലാക്കി. ഇയാളും കൂട്ടാളിയും തമിഴ്‌നാട്ടില്‍ നിന്നും വില്‍പ്പനക്കായി എത്തിച്ച രണ്ട് കിലോ കഞ്ചാവുമായി കരമന ഭാഗത്ത് വെച്ച് പിടികൂടുകയായിരുന്നു.
വര്‍ഷങ്ങളായി കഞ്ചാവ് കച്ചവടം നടത്തുന്ന ഇയാള്‍ക്ക് ഫോര്‍ട്ട്, കാട്ടാക്കട എന്നീ സ്റ്റേഷനുകളില്‍ നിരവധി കേസുകളാണുള്ളത്. ഇയാളുമായി ബന്ധമുള്ള മറ്റു കഞ്ചാവ് കച്ചവടക്കാരും നിരിക്ഷണത്തിലാണെന്നും, നഗരത്തില്‍ കഞ്ചാവ് വില്‍പ്പന നടത്തുന്നവരെ പിടികൂടുന്ന ശക്തമായി നടപടി തുടരുമെന്നും സിറ്റി പൊലിസ് കമ്മീഷണര്‍ പി. പ്രകാശ് അറിയിച്ചു.
കണ്‍ട്രോള്‍ റൂം എ.സി സുരേഷ് കുമാര്‍ .വി, കരമന എസ്.ഐ ശ്രീകാന്ത്, ഷാഡോ എസ്.ഐ സുനില്‍ ലാല്‍, ഷാഡോ എ.എസ്.ഐമാരായ അരുണ്‍ കുമാര്‍, യശോധരന്‍, ഷാഡോ ടീമാംഗങ്ങള്‍ എന്നിവരാണ് അന്വേഷണത്തിനും അറസ്റ്റിനും ഉണ്ടായിരുന്നത്.