തിരുവനന്തപുരം: വയനാട്, പാലക്കാട്, ചേലക്കര മണ്ഡലങ്ങളിലെ ഉപതെരഞ്ഞെടുപ്പ് തീയതി പ്രഖ്യാപിച്ചതിന് പിന്നാലെ സ്ഥാനാര്‍ത്ഥികളെ ഔദ്യോഗികമായി പ്രഖ്യാപിക്കാനൊരുങ്ങി കോണ്‍ഗ്രസ്. യൂത്ത് കോണ്‍ഗ്രസ് സംസ്ഥാന അധ്യക്ഷന്‍ രാഹുല്‍ മാങ്കൂട്ടത്തില്‍ പാലക്കാടും, രമ്യ ഹരിദാസ് ചേലക്കരയിലും സ്ഥാനാര്‍ത്ഥികളാകും. സംസ്ഥാന നേതൃത്വം ഹൈക്കമാന്‍ഡിന് നല്‍കിയ പട്ടികയില്‍ ഓരോ മണ്ഡലത്തിലും ഓരോ സ്ഥാനാര്‍ത്ഥികളുടെ പേരുകള്‍ മാത്രമാണ് നല്‍കിയിട്ടുള്ളത്. വയനാട്ടിലെ സ്ഥാനാര്‍ത്ഥിയായി നേരത്തെ തന്നെ പ്രിയങ്ക ഗാന്ധിയെ തീരുമാനിച്ചിരുന്നു. സ്ഥാനാര്‍ത്ഥികളെ സംബന്ധിച്ച ഔദ്യോഗിക പ്രഖ്യാപനവും ഉടനുണ്ടാകും.

ചേലക്കരയില്‍ സിപിഎം സ്ഥാനാര്‍ത്ഥിയായി യുആര്‍ പ്രദീപ് മത്സരിക്കാനാണ് സാധ്യത. പാലക്കാട് ബിനുമോള്‍ക്കൊപ്പം മറ്റുള്ളവരെയും സിപിഎം പരിഗണിക്കുന്നുണ്ട്. വയനാട്ടിലെ സിപിഐ സ്ഥാനാര്‍ത്ഥി ആരായിരിക്കുമെന്ന ആകാംക്ഷ ഇപ്പോഴും നിലനില്‍ക്കുന്നു. കേന്ദ്ര നേതൃത്വത്തിന് മൂന്നു മണ്ഡലത്തിലും മൂന്നു വീതം പേരുകളാണ് നല്‍കിയിട്ടുള്ളതെന്നും വിജയ സാധ്യത കൂടുതലുള്ളവര്‍ സ്ഥാനാര്‍ത്ഥിയാകുമെന്നും ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ വ്യക്തമാക്കി.

പാലക്കാട് മണ്ഡലത്തില്‍ ബിജെപി സാധ്യത പട്ടികയില്‍ സി കൃഷ്ണകുമാര്‍, ശോഭ സുരേന്ദ്രന്‍ എന്നിവരുണ്ട്. എം ടി രമേശ്, ശോഭ സുരേന്ദ്രന്‍, എപി അബ്ദുള്ളക്കുട്ടി എന്നിവരാണ് വയനാട്ടിലെ സാധ്യതാ പട്ടികയില്‍. ചേലക്കരയില്‍ പ്രൊഫ. ടി എന്‍ സരസുവും പരിഗണനയിലുണ്ട്. സ്ഥാനാര്‍ത്ഥികളെ സംബന്ധിച്ച അന്തിമ തീരുമാനം ബിജെപി കേന്ദ്ര നേതൃത്വം കൈക്കൊള്ളുമെന്നാണ് സംസ്ഥാന നേതാക്കള്‍ വ്യക്തമാക്കുന്നത്.

Congress Candidates for Palakkad and Chelakkara Constituencies Announced