അടിമാലി: കൊച്ചി- ധനുഷ്‌ക്കോടി ദേശീയപാതയില്‍ കല്ലാര്‍ പാലത്തിനു സമീപം വീണ്ടും മണ്ണിടിഞ്ഞു പാലം അപകടാവസ്ഥയിലായി.
പുതിയ പാലം നിര്‍മിക്കുന്നതിനായി മണ്ണെടുത്ത ഭാഗത്താണു വീണ്ടും മണ്ണിടിച്ചില്‍ ഉണ്ടായത്. ഒരുമാസം മുമ്പുണ്ടായ ശക്തമായ മഴയിലാണ് ആദ്യം മണ്ണിടിഞ്ഞത്. നിരന്തരമായി മണ്ണിടിയുന്നതു നിലവിലെ പാലത്തിനു കൂടുതല്‍ ഭീഷണിയാണ്. പുതിയ പാലത്തിന്റെ നിര്‍മാണം ഏറ്റെടുത്ത കരാറുകാരന്‍ പുതിയ നിര്‍മാണത്തിനായി മണ്ണെടുത്തതിനുശേഷം പണി ആരംഭിച്ചിട്ടില്ല.
ഇതാണു പ്രശ്‌നത്തിനു കാരണം. നാലുമാസത്തില്‍ കൂടുതലായി നിര്‍മാണം നിര്‍ത്തിവച്ചിരിക്കുകയാണ്. ഇതുവഴിയുള്ള ഗതാഗതം നിലച്ചാല്‍ മാങ്കുളം പഞ്ചായത്തും പള്ളിവാസല്‍ പഞ്ചായത്തിലെ കല്ലാര്‍, വട്ടിയാര്‍, കുരിശുപാറ, പീച്ചാട്, അടിമാലി പഞ്ചായത്തിലെ പ്ലാമല, കൊടകല്ല്, കുറത്തികുടി തുടങ്ങിയ ആദിവാസി കോളനികളും ഒറ്റപ്പെടും.അതിനാല്‍ പുതിയ പാലത്തിന്റെ നിര്‍മാണം ഉടന്‍ പുനരാരംഭിക്കണമെന്നും പാലത്തിനു മുകളിലൂടെ ഭാരം കയറ്റിയ വാഹനങ്ങള്‍ നിരോധിക്കണമെന്നും ആവശ്യം ശക്തമായിട്ടുണ്ട്. മൂന്നാറിലേക്കുള്ള പ്രധാന റോഡിലാണു കല്ലാര്‍ പാലം