വിഴിഞ്ഞം: പൂവാര്‍ പൊലിസിന് തലവേദനയായി വീണ്ടും ക്ഷേത്രത്തില്‍ മോഷണം. പുത്തന്‍ കട കുമിളി ശ്രീകൃഷ്ണ സ്വാമി ക്ഷേത്രത്തിലെ ഓഫിസിന്റെ വാതില്‍ പൊളിച്ചു കയറി ഓഫിസില്‍ സൂക്ഷിച്ചിരുന്ന വെള്ളി കിരീടവും സ്വര്‍ണാഭരണങ്ങളും  കാണിക്ക വഞ്ചികളിലെ പണം ഉള്‍പ്പടെയുള്ളവയാണ് കവര്‍ന്നത്. ഒരു കാണിക്ക വഞ്ചിയും രണ്ടു കാണിക്ക വഞ്ചി തല്ലിപ്പൊളിച്ച് അതിലുണ്ടായിരുന്നപണവും കള്ളന്മാര്‍ കൊണ്ടുപോയി. അന്വേഷണം വഴിതെറ്റിക്കാന്‍ സ്ഥലത്ത് മുളകുപൊടിയും വിതറിയാണ് കവര്‍ച്ചക്കാര്‍ മടങ്ങിയത്. വിരലടയാള വിദഗ്ധരും ഡോഗ് സ്‌ക്വാഡും സ്ഥലത്തെത്തി തെളിവുകള്‍ ശേഖരിച്ചു. പൂവാര്‍ സി.ഐ സുരേഷ് കുമാറിന്റെ മേല്‍നോട്ടത്തില്‍ പ്രത്യേക സ്‌ക്വാഡ് രൂപികരിച്ച്  അന്വേഷണം തുടങ്ങിയതായി പൊലിസ് പറഞ്ഞു.
ഇന്നലെ രാവിലെയാണു ക്ഷേത്രത്തിലെ ഓഫിസ് വാതില്‍ കുത്തിപ്പൊളിച്ച നിലയില്‍ കണ്ടെത്തിയത്. തുടര്‍ന്നു നടത്തിയ പരിശോധനയിലാണ് വിലപിടിപ്പുള്ള കല്ലു പതിപ്പിച്ച രണ്ടു വെള്ളിക്കിരീടം, കല്ലു പതിപ്പിക്കാത്ത ഒരു വെള്ളിക്കിരീടം, 20 സ്വര്‍ണ പൊട്ടുകള്‍, ഏഴു സ്വര്‍ണത്താലി, രണ്ടു മുഖ ചാര്‍ത്തുകള്‍ എന്നിവ നഷ്ടമായതായി കണ്ടെത്തിയത്. മൂന്നു കാണിക്ക വഞ്ചികളില്‍ നിന്നു  ആയിരക്കണക്കിന് രൂപയുംനഷ്ടപ്പെട്ടതായി കണക്കാക്കുന്നു. എന്നാല്‍ക്ഷേത്രത്തിലെ തങ്ക അങ്കി, വിലപിടിപ്പുള്ള വിളക്കുകള്‍ ഉള്‍പ്പടെയുള്ള മറ്റു സാധനങ്ങള്‍ കവര്‍ച്ച ചെയ്യപ്പെട്ടിട്ടില്ല.
കവര്‍ച്ചക്ക് ശേഷം  വാതിലിനു ചുറ്റും മുളകു പൊടി വിതറിയത് പൊലിസ് നായയുടെ മണം പിടിക്കല്‍ തടയാന്‍ ലക്ഷ്യമിട്ടാണെന്നും പൊലിസ് വിശദീകരിച്ചു. നാല് വര്‍ഷം മുന്‍പും സമാനമായ രീതിയില്‍ ഇവിടെ മോഷണം നടന്നിരുന്നു. മേഖലയില്‍ മോഷണങ്ങള്‍ പതിവായതോടെ സുരക്ഷക്കായി എല്ലാ ആരാധനാലയങ്ങളിലുംകാമറകള്‍ സ്ഥാപിക്കണമെന്ന് പൊലിസ് നേരത്തെ നിര്‍ദ്ദേശം നല്‍കിയിരുന്നു. ഇതിന്റെ അടിസ്ഥാനത്തില്‍ കുമിളി ക്ഷേത്രത്തില്‍ സി.സി.ടി.വി സ്ഥാപിക്കുന്ന ജോലികള്‍ ഉടന്‍ നടത്താനിരിക്കുകയായിരുന്നുവെന്നും ഭാരവാഹികള്‍ പറഞ്ഞു.