പൊട്ടിവീണ വൈദ്യുതലൈനില്‍ നിന്ന് ഷോക്കേറ്റ് വിദ്യാര്‍ഥി മരിച്ചു

തിരുവമ്പാടി: പൊട്ടിവീണ വൈദ്യുതലൈനില്‍ തട്ടി ഷോക്കേറ്റ് വിദ്യാര്‍ഥി മരിച്ചു. തിരുവമ്പാടി പുന്നക്കല്‍ മേനോംമൂട്ടില്‍ ജോണിയുടെയും ഷിജിയുടെയും മകന്‍ ഷോണ്‍ ജോണ്‍(13) ആണ് മരിച്ചത്. ഇന്നലെ സ്‌കൂള്‍ വിട്ടുവന്ന ഷോണിനെ അമ്മ ജലനിധിയുടെ പൈപ്പ് തുറക്കാന്‍ വിട്ടതായിരുന്നു. വീട്ടില്‍നിന്ന് 100 മീറ്റര്‍ അകലെ അമ്മയുടെ കണ്‍മുന്നിലായിരുന്നു അപകടം. ഉടന്‍ തിരുവമ്പാടിയിലെ സ്വകാര്യ ആശുപത്രിയില്‍ പ്രവേശിപ്പിച്ചുവെങ്കിലും രക്ഷിക്കാനായില്ല. സഹോദരന്‍ ഡോണ്‍. പുന്നക്കല്‍ സെന്റ് സെബാസ്റ്റ്യന്‍സ് ഹൈസ്‌കൂള്‍ എട്ടാംതരം വിദ്യാര്‍ഥിയാണ് മരിച്ച ഷോണ്‍.
രണ്ടാഴ്ച മുന്‍പും ഈ വൈദ്യുതി ലൈന്‍ പൊട്ടിവീണിരുന്നു. നാട്ടുകാര്‍ അറിയിച്ചതിനെ തുടര്‍ന്ന് വൈദ്യുതി ബന്ധം വിഛേദിച്ചിരുന്നു. പിന്നീട് കെ. എസ്.ഇ.ബി അധികൃതരെത്തി നന്നാക്കിയെങ്കിലും വീണ്ടും പൊട്ടിവീഴുകയായിരുന്നു. ഇതില്‍ തട്ടിയാണ് ഷോണ്‍ മരിച്ചത്.
സംഭവത്തില്‍ കെ.എസ്.ഇ.ബിയുടെ അനാസ്ഥക്കെതിരേയും അധികൃതര്‍ക്കെതിരേ കൊലക്കുറ്റത്തിന് കേസെടുക്കണമെന്നാവശ്യപ്പെട്ട് ജനപ്രതിനിധികളുടെ നേതൃത്വത്തില്‍ തിരുവമ്പാടി കെ.എസ്.ഇ.ബി ഓഫിസിന് മുന്നില്‍ പ്രതിഷേധം സംഘടിപ്പിച്ചു.