കുടക്: സൈനിക സ്‌കൂളിലെ ശുചിമുറിയില്‍ മരിച്ചനിലയില്‍ കണ്ട വിദ്യാര്‍ഥി അധ്യാപകന്‍ ശകാരിച്ചതിനുപിന്നാലെ രാസപദാര്‍ഥം കഴിച്ചിരുന്നതായി പൊലിസ്. കര്‍ണാടക കുടക് കുശാല്‍ നഗറിലെ സൈനിക സ്‌കൂളിലാണ് ഒന്‍പതാം ക്ലാസ് വിദ്യാര്‍ഥി എന്‍.പി. ചെങ്കപ്പയെ(15) ജൂണ്‍ 23ന് മരിച്ച നിലയില്‍ കണ്ടെത്തിയത്.

ചെങ്കപ്പയെ കംപ്യൂട്ടറില്‍ അശ്ലീല ചിത്രം കണ്ടതിന് കംപ്യൂട്ടര്‍ അധ്യാപകന്‍ ശകാരിച്ചിരുന്നു. മാപ്പു പറഞ്ഞുകൊണ്ടുള്ള കത്ത് നല്‍കാനും ആവശ്യപ്പെട്ടിരുന്നു.

ഇതിനുപിന്നാലെ കെമിസ്ട്രി ലാബിലെത്തിയ ചെങ്കപ്പ രാസപദാര്‍ഥമെടുത്തു കുടിക്കുന്നതു സി.സി.ടി.വി ദൃശ്യങ്ങളില്‍ പതിഞ്ഞിട്ടുണ്ട്. ഇതിനുശേഷം ഒന്നരയോടെ പൊതു ശുചിമുറിയില്‍ പ്രവേശിച്ച ചെങ്കപ്പ അകത്തുനിന്നു വാതില്‍ പൂട്ടുകയായിരുന്നു.

പിന്നീട് വൈകീട്ടായിട്ടും ചെങ്കപ്പയെ കാണാതായപ്പോള്‍ നടത്തിയ തെരച്ചിലിലാണ് ശുചിമുറിയില്‍ കുട്ടിയെ അബോധാവസ്ഥയില്‍ കണ്ടെത്തിയത്.

ചെങ്കപ്പയെ കൊലപ്പെടുത്തിയതാണെന്നും ഉത്തരവാദികള്‍ക്കെതിരെ നടപടി എടുക്കണമെന്നും ആവശ്യപ്പെട്ടു ബന്ധുക്കളും നാട്ടുകാരും ഇന്നലെ രാത്രി മൃതദേഹവുമായി ആശുപത്രിക്കു മുന്നില്‍ പ്രതിഷേധിച്ചു. ചില അധ്യാപകര്‍ തന്നെ പീഡിപ്പിക്കുന്നതായി ചെങ്കപ്പ നേരത്തെ പിതാവിനോട് പറഞ്ഞിരുന്നു. ഇതിന്റെ അടിസ്ഥാനത്തില്‍ പിതാവ് വൈസ് പ്രിന്‍സിപലിന് പരാതി നല്‍കിയിരുന്നെങ്കിലും നടപടിയൊന്നും ഉണ്ടായില്ലെന്ന് പറയുന്നു. ഇതേത്തുടര്‍ന്ന് സ്‌കൂള്‍ വൈസ് പ്രിന്‍സിപ്പലിനും നാലു ജീവനക്കാര്‍ക്കും എതിരെ പൊലിസ് കേസെടുത്തിട്ടുണ്ട്