ജിദ്ദ: സഊദിയില്‍ ഏകീകൃത ആരോഗ്യ ഇന്‍ഷൂറന്‍സ് നടപ്പാക്കുവാന്‍ കൗണ്‍സില്‍ ഓഫ് കോഓപ്പറേറ്റീവ് ഹെല്‍ത്ത് ഇന്‍ഷുറന്‍സ് നിര്‍ദ്ദേശിച്ചു. ഈ മാസം 10 മുതല്‍ നിലവില്‍ വന്ന പദ്ധതിയുടെ അവസാന ഘട്ടത്തില്‍ ഇരുപത്തഞ്ച് ജീവനക്കാരില്‍ കുറവുള്ള എല്ലാ സ്ഥാപനങ്ങളും തങ്ങളുടെ തൊഴിലാളികള്‍ക്ക് ഇന്‍ഷൂറന്‍സ് പരിരക്ഷ നല്‍ണമെന്നാണ് നിര്‍ദ്ദേശിക്കുന്നത്. ഇതിലൂടെ തൊഴിലാളികളെയും കുടുംബത്തെ കൂടി ഉള്‍ക്കൊള്ളിച്ച് സമ്പൂര്‍ണ ആരോഗ്യ ഇന്‍ഷൂറന്‍സ് പദ്ധതി നടപ്പാക്കും.

തൊഴിലാളികളുടെ മക്കളില്‍ ആണ്‍കുട്ടികള്‍ക്ക് 25 വയസ്സ് വരെയും, പെണ്‍കുട്ടികള്‍ക്ക് അവരുടെ വിവാഹം വരെയുമാണ് ഇന്‍ഷുറന്‍സ് പരിരക്ഷ നല്‍കേണ്ടത്.ഇത് പാലിക്കാത്ത തൊഴില്‍ സ്ഥാപനങ്ങള്‍ക്ക് പിഴ ചുമത്തും.

ഏകീകൃത ആരോഗ്യ ഇന്‍ഷൂറന്‍സ് പദ്ധതിയുടെ ആദ്യ ഘട്ടത്തില്‍ 100ലധികം തൊഴിലാളികള്‍ക്കുള്ള കമ്പനികളാണ് ഉള്‍പ്പെട്ടിരുന്നത്. രണ്ടാം ഘട്ടത്തില്‍ 99നും 50നും ഇടയില്‍ തൊഴിലാളികള്‍ക്കുള്ള സ്ഥാപനങ്ങളെയും, മൂന്നാം ഘട്ടത്തില്‍ 49നും 25നും ഇടയില്‍ തൊഴിലാളികള്‍ക്കുള്ള സ്ഥാപനങ്ങളെയുമാണ് ഉള്‍പ്പെടുത്തിയത്. അവസാന ഘട്ടത്തിലാണ് 25ല്‍ താഴേ തൊഴിലാളികള്‍ക്കുള്ള സ്ഥാപനങ്ങളെ ഉള്‍പ്പെടുത്തിയത്. ഇതോടെ സ്വകാര്യ മേഖലയിലുള്ള എല്ലാ സ്ഥാപനങ്ങളും പദ്ധതിയുടെ കീഴിലായി.