തിരുവനന്തപുരം: ഓരോ ലോക്‌സഭാ മണ്ഡലത്തിലെയും ഒരു ബൂത്തിലെ വിവിപാറ്റ് സ്ലിപ്പുകള്‍ എണ്ണുമെന്ന് മുഖ്യ തെരഞ്ഞെടുപ്പ് ഓഫിസര്‍ ടിക്കാറാം മീണ. കണ്‍ട്രോള്‍ യൂനിറ്റിലെ കണക്കും സ്ലിപ്പുകളുടെ എണ്ണവും ഒന്നാണോയെന്ന് പരിശോധിക്കുന്നതിനാണ് ഇത്. റിട്ടേണിങ് ഓഫിസര്‍ നറുക്കെടുപ്പിലൂടെയാണ് ഇതിനുള്ള പോളിങ് ബൂത്ത് കണ്ടെത്തുകയെന്നും അദ്ദേഹം പറഞ്ഞു. മാധ്യമപ്രവര്‍ത്തകര്‍ക്കായി നടത്തിയ ഇ.വി.എം, വിവിപാറ്റ് ബോധവല്‍കരണ പരിപാടി ഉദ്ഘാടനം ചെയ്യുകയായിരുന്നു അദ്ദേഹം.
ഒരു ബൂത്തില്‍ 1400 വോട്ടര്‍മാരാണുണ്ടാവുക. വിവിപാറ്റ് ഏര്‍പ്പെടുത്തിയതോടെ ഒരാള്‍ക്ക് വോട്ട് ചെയ്യുന്നതിന് 12 സെക്കന്‍ഡ് വേണ്ടിവരുമെന്നാണ് കണക്കാക്കുന്നത്. വിവിപാറ്റ് മെഷിനില്‍ വോട്ട് ചെയ്തതിന്റെ വിവരം ഏഴു സെക്കന്‍ഡ് കാണാനാകും. ഇതുസംബന്ധിച്ച് പരാതിയുണ്ടെങ്കില്‍ പ്രിസൈഡിങ് ഓഫിസറെ അറിയിച്ചാല്‍ ടെസ്റ്റ് വോട്ട് ചെയ്യാനാകും. എന്നാല്‍, ആരോപണം തെറ്റാണെന്ന് തെളിഞ്ഞാല്‍ ആറു മാസം തടവും ആയിരം രൂപ പിഴയും രണ്ടും കൂടിയും ലഭിക്കും.
തെരഞ്ഞെടുപ്പുമായി ബന്ധപ്പെട്ട് വിപുലമായ ബോധവല്‍ക്കരണം നടത്തും. ഒരു മിനിട്ടിന്റെ വിഡിയോ ഇതിനായി തയാറാക്കിയിട്ടുണ്ട്. നൂതനമായ കൂടുതല്‍ പ്രചാരണ പരിപാടികള്‍ വരുംദിവസങ്ങളില്‍ നടപ്പാക്കുമെന്നും മുഖ്യതെരഞ്ഞെടുപ്പ് ഓഫിസര്‍ പറഞ്ഞു. ഇ.വി.എമ്മും വിവിപാറ്റും ഉപയോഗിക്കുന്ന വിധം മുഖ്യതെരഞ്ഞെടുപ്പ് ഓഫിസറും സംസ്ഥാതല തെരഞ്ഞെടുപ്പ് മാസ്റ്റര്‍ ട്രെയിനര്‍ ഷാനവാസ് ഖാനും വിശദീകരിച്ചു.