മലപ്പുറം: രാഹുലിന് ശക്തി പകരാന്‍ എല്‍.ഡി.എഫിന് വോട്ടു ചെയ്യണമെന്ന പൊന്നാനിയിലെ ഇടതു സ്ഥാനാര്‍ഥി പി.വി അന്‍വറിന്റെ പ്രസംഗം സോഷ്യല്‍ മീഡിയയില്‍ ചര്‍ച്ചയാവുന്നു.

കഴിഞ്ഞ ദിവസം തിരൂരില്‍ നടന്ന നിയോജക മണ്ഡലം കണ്‍വന്‍ഷനില്‍ സംസാരിക്കവേയാണ് അന്‍വര്‍ രാഹുലിന്റെ പേര് പറഞ്ഞ് വോട്ടഭ്യര്‍ഥിച്ചത്.
കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്ക് കേന്ദ്രത്തില്‍ സര്‍ക്കാര്‍ രൂപീകരിക്കാന്‍ കരുത്തു പകരാന്‍ വോട്ടു നല്‍കൂ എന്നായിരുന്നു അന്‍വറിന്റെ അഭ്യര്‍ഥന. പ്രസംഗം സോഷ്യല്‍മീഡിയയില്‍ പരന്നതോടെ എതിരാളികളും ട്രോളന്‍മാരും അത് ഏറ്റെടുത്തു. അങ്ങനെയെങ്കില്‍ വളഞ്ഞ് മൂക്കു പിടിക്കാതെ നേരെ യു.ഡി.എഫ് സ്ഥാനാര്‍ഥി ഇ.ടി മുഹമ്മദ് ബഷീറിന് വോട്ട് ചെയ്താല്‍ പോരേ എന്നാണ് ട്രോളന്‍മാര്‍ ചോദിക്കുന്നത്.
ഭൂമി കൈയേറ്റവും അനധികൃത പാര്‍ക്കുമുള്‍പ്പെടെ പി.വി അന്‍വറിനെതിരേ ഉയര്‍ന്നുവന്ന ആരോപണങ്ങളെ പ്രതിരോധിക്കാനാവാതെ നില്‍ക്കുന്നതിനിടെയാണ് ഇടതുപക്ഷത്തെ വെട്ടിലാക്കി വീണ്ടും അന്‍വറിന്റെ വോട്ടഭ്യര്‍ഥന.