ചൊക്ലി: മേനപ്രം, വലിയാണ്ടി പീടിക മേഖലയില്‍ ഭ്രാന്തന്‍ നായയുടെ കടിയേറ്റ് മൂന്നു പേര്‍ക്കു പരുക്ക്. വളര്‍ത്തുമൃഗങ്ങള്‍ക്കും കടിയേറ്റു. മേനപ്രം കക്കാന്റെവിടെ നിധീഷ് (28), കക്കാന്റെവിടെ മീത്തല്‍ ലക്ഷ്മി (73), വലിയാണ്ടി പീടികയില്‍ കളത്തില്‍ താഴെ കുനിയില്‍ അഷ്‌റഫിന്റെ മകന്‍ അഹദല്‍ (11) എന്നിവര്‍ക്കും രണ്ടു പശുക്കള്‍ക്കും ഒരു ആടിനുമാണ് കടിയേറ്റത്. ഇന്നലെ രാവിലെ ആടുകള്‍ ബഹളം വെയ്ക്കുന്ന ശബ്ദം കേട്ടു പുറത്തിറങ്ങിയ നിധീഷിന്റെ മുതുകിനാണ് കടിയേറ്റത്.
സുബ്ഹി നമസ്‌ക്കാരത്തിനു പോയി തിരിച്ചു വരുമ്പോഴാണ് അഹദലിനു കടിയേറ്റത്. മേനപ്രം പുതുക്കുടിയിലെ നാണുവിന്റെയും കേളോത്ത് താഴെ കുനിയില്‍ പുഷ്പയുടെയും പശുക്കളെയും നായ കടിച്ചു. ഒരു ആടിനും കടിയേറ്റിട്ടുണ്ട്.