പിണറായി: പിണറായി പെരുമയില്‍ കേരളത്തിന്റെ വിവിധ ഭാഗങ്ങളില്‍ നിന്ന് എത്തിച്ചേര്‍ന്ന കലാകാരന്മാര്‍ പിണറായിക്കാരുടെ സ്വന്തം അംബാസിഡര്‍മാരെന്ന് മുഖ്യമന്ത്രി പിണറായി വിജയന്‍. അഞ്ച് ദിവസങ്ങളിലായി പിണറായിയില്‍ നടന്നുവരുന്ന സാംസ്‌കാരികോത്സവത്തിന്റെ സമാപന പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
പിണറായിയും കണ്ണൂരും അക്രമത്തിന്റെ പ്രദേശമാണെന്ന് ആരെങ്കിലും പറഞ്ഞാല്‍ ഇവിടെ സ്‌നേഹവും ഊഷ്മളമായ വരവേല്‍പും അനുഭവിച്ച കണ്ണൂരിന് പുറത്തുള്ള കലാകാരന്മാര്‍ ഇനിയത് തിരുത്തും. നന്മയും സ്‌നേഹവും കൈമുതലായ ഈ നാടിനെ അക്രമത്തിന്റെ പ്രദേശമായി വരച്ചുകാണിക്കാന്‍ ശ്രമം നടക്കുന്നുണ്ട്. ഇത് യാഥാര്‍ഥ്യത്തിന് നിരക്കില്ല.
പിണറായി പെരുമ ശ്രദ്ധനേടുന്നത് ഈ സാഹചര്യത്തിലാണ്. ഇവിടത്തെ ജനതയുടെ ക്ഷമയും സമഭാവനയും ആര്‍ദ്രതയും നമുക്കറിയാമെങ്കിലും പുറത്തുള്ളവര്‍ക്ക് അറിയില്ല. അവര്‍ക്ക് പിണറായി ഗ്രാമത്തെ കുറിച്ച് കേട്ടറിവ് മാത്രമാണുള്ളത്.
കേരളത്തിന്റെ വിവിധ ഭാഗങ്ങളില്‍ നിന്ന് ഇവിടെയെത്തിയ പ്രതിഭകള്‍ക്കും കലാകാരന്മാര്‍ക്കും ഈ നാടിന്റെ നന്മ നേരിട്ട് മനസിലാക്കാനായി. ഇവരുടെ പ്രകടനങ്ങള്‍ ആസ്വദിക്കാന്‍ നാട്ടുകാര്‍ക്കും സാധിച്ചുവെന്നത് വലിയ നേട്ടമാണെന്ന് മുഖ്യമന്ത്രി പറഞ്ഞു.
സിനിമാതാരവും പ്രസിദ്ധ നര്‍ത്തകിയുമായ ദിവ്യ ഉണ്ണിയുടെ ഭരതനാട്യം കുറച്ചു നേരം ആസ്വദിച്ച ശേഷമാണ് പിണറായി സമാപന സമ്മേളനത്തിലെത്തിയത്.
കെ.കെ രാഗേഷ് എം.പി അധ്യക്ഷനായി. സിനിമാ സംവിധായകന്‍ അടൂര്‍ ഗോപാലകൃഷ്ണന്‍ മുഖ്യാതിഥിയായി. മന്ത്രി കടന്നപ്പള്ളി രാമചന്ദ്രന്‍, പി.കെ ശ്രീമതി എം.പി, സൂര്യകൃഷ്ണമൂര്‍ത്തി, മുന്‍ എം.എല്‍.എ പി ജയരാജന്‍ സംസാരിച്ചു.