ജമ്മു: തെരഞ്ഞെടുപ്പിന് മുന്‍പുതന്നെ നാഷ്‌നല്‍ കോണ്‍ഫറന്‍സും കോണ്‍ഗ്രസും സഖ്യം സ്ഥാപിച്ചിരുന്നെങ്കിലും ഇപ്പോള്‍ ബി.ജെ.പിയെ എതിരിടാന്‍ കോണ്‍ഗ്രസിന് പിന്തുണയുമായി ജമ്മുകശ്മിരില്‍ മെഹബൂബ മുഫ്തിയുടെ പി.ഡി.പിയും തയാറായി. മുന്‍ധാരണകളൊന്നുമില്ലാതെയാണ് പി.ഡി.പി കോണ്‍ഗ്രസിന് പിന്തുണ നല്‍കുന്നതെന്ന് മെഹബൂബ മുഫ്തി പറഞ്ഞു. ജമ്മുകശ്മിരിലെ ആറ് മണ്ഡലങ്ങളില്‍ ജമ്മു-പൂഞ്ച് അടങ്ങുന്ന ജമ്മു മണ്ഡലത്തിലും ഉദംപൂര്‍ മണ്ഡലത്തിലുമാണ് കോണ്‍ഗ്രസിനെ പിന്തുണക്കുകയെന്ന് പി.ഡി.പി അറിയിച്ചു.

ഈ രണ്ട് സീറ്റുകളിലും കോണ്‍ഗ്രസും ബി.ജെ.പിയും നേരിട്ട് ഏറ്റുമുട്ടുകയാണ്.
ഇതില്‍ കോണ്‍ഗ്രസിനെ പിന്തുണക്കുകയെന്നതാണ് പി.ഡി.പിയുടെ ചുമതലയെന്നും നേതാക്കള്‍ വ്യക്തമാക്കി.

അതിര്‍ത്തിയിലെ പൂഞ്ച്, രജൗറി ജില്ലകളില്‍ പി.ഡി.പി പ്രബല ശക്തികളാണ്. ഉദംപൂര്‍ സീറ്റിലും അവരെ അവഗണിക്കാന്‍ കഴിയില്ല.
നാളെ ജമ്മുവിലെത്തുന്ന മെഹബൂബ രണ്ട് സീറ്റുകളിലേയും പിന്തുണ സംബന്ധിച്ച് കോണ്‍ഗ്രസ് നേതൃത്വവുമായി ചര്‍ച്ച നടത്തുമെന്ന് പി.ഡി.പി നേതൃത്വം അറിയിച്ചു.