റിയാദ്: ജിദ്ദയില്‍നിന്നും പുറപ്പെടേണ്ട എയര്‍ ഇന്ത്യയുടെ കൊച്ചി, മുംബൈ സര്‍വിസുകള്‍ അനിശ്ചിതമായി നീണ്ടത് യാത്രക്കാരെ വലച്ചു.

ഞായറാഴ്ച രാത്രി 9.15ന് പുറപ്പെടേണ്ട മുംബൈ സര്‍വിസും രാത്രി 11ന് പോകേണ്ട കൊച്ചി സര്‍വിസുമാണ് വിമാനം എത്താത്തതിനെ തുടര്‍ന്ന് അനിശ്ചിതമായി നീണ്ടത്. വിമാനം വൈകുന്നത് മുന്‍കൂട്ടി അറിയിക്കാത്തതിനെ തുടര്‍ന്ന് എയര്‍പോര്‍ട്ടില്‍ എത്തിയ യാത്രക്കാര്‍ക്ക് ഏറെ നേരം വിമാനത്താവളത്തില്‍ കഴിയേണ്ടിവന്നു.

മുംബൈ വഴി കോഴിക്കോട്ടേക്ക് കണക്ഷന്‍ ടിക്കറ്റെടുത്തവരാണ് വെട്ടിലായത്.
മുംബൈക്കു പോകേണ്ട വിമാനം പുലര്‍ച്ചെ 3.30നും കൊച്ചി വിമാനം ഇന്നു രാവിലെ എട്ടു മണിക്കും പോകുമെന്നാണ് അറിയാന്‍ കഴിഞ്ഞതെന്നും എന്നാല്‍ ഇക്കാര്യം ഔദ്യോഗികമായി അറിയിക്കുന്നതിനോ വിമാനത്താവളത്തിലെത്തിയ യാത്രക്കാര്‍ക്ക് നിര്‍ദേശങ്ങള്‍ നല്‍കുന്നതിനോ എയര്‍ ഇന്ത്യന്‍ അധികൃതര്‍ ശ്രമിച്ചില്ലെന്നും യാത്രക്കാര്‍ പരാതിപ്പെട്ടു. കോഴിക്കോട്ടേക്കുള്ള കണക്ഷന്‍ വിമാനം മുംബൈയില്‍നിന്നും ലഭിക്കാന്‍ ഇനി സാധ്യതയില്ലെന്നും ഇത് ഏറെ ബുദ്ധിമുട്ടുണ്ടാക്കുമെന്നും യാത്രക്കാര്‍ വ്യക്തമാക്കി.