വെന്നിയൂര്‍: ദേശീയപാതയില്‍ അമിതവേഗതയില്‍ വന്ന സ്വകാര്യബസ് നാട്ടുകാര്‍ തടഞ്ഞിട്ടു. വെന്നിയൂര്‍ കൊടിമരത്തില്‍ വൈകീട്ട് ആറോടെയാണ് സംഭവം.
കോഴിക്കോട് ഭാഗത്തേക്കു പോകുന്ന പുളിക്കല്‍ ബസ് അപകടകരമായ രീതിയില്‍ ഓടിച്ചുപോകുന്നതിനിടെയാണ് നാട്ടുകാര്‍ തടഞ്ഞത്. എന്നാല്‍ ബസ് തടഞ്ഞതിനെതിരെ ജീവനക്കാര്‍ പ്രതിഷേധിച്ചത് തര്‍ക്കം രൂക്ഷമാകാന്‍ കാരണമായി. ബസ് വിട്ടുനല്‍കുന്നതിന് മോട്ടോര്‍ വാഹന വകുപ്പ് അധികൃതരത്തണമെന്ന് നാട്ടുകാര്‍ വാശി പിടിച്ചതോടെ ദേശീയ പാതയില്‍ ഗതാഗത കുരുക്ക് അനുഭവപ്പെട്ടു. പിന്നീട് മോട്ടോര്‍ വാഹനവകുപ്പ് ഉദ്യോഗസ്ഥരും പൊലിസും സ്ഥലത്തെത്തി നാട്ടുകാരെ തണുപ്പിച്ചതോടെയാണ് സംഘര്‍ഷത്തിന് അയവുവന്നത്. ഡ്രൈവര്‍ക്കെതിരെ കേസെടുത്തു. ലൈസന്‍സ് റദ്ദാക്കാനുള്ള നടപടി സ്വീകരിച്ചതായി പൊലിസ് പറഞ്ഞു.