മുംബൈ: മഹാരാഷ്ട്രയില്‍ എട്ട് കര്‍ണാടക വിദ്യാര്‍ഥികള്‍ മുങ്ങിമരിച്ചു. സിന്ധുദുര്‍ഗ് ജില്ലയിലെ വായ്‌രി തീരത്താണ് അപകടം. കര്‍ണാടക ബെല്‍ഗ്വം ജില്ലയില്‍ നിന്നുള്ളവരാണ് മരിച്ചവര്‍.

ബെല്‍ഗ്വത്തെ മറാത്ത എന്‍ജിനിയറിങ് കോളജില്‍ നിന്ന് വിനോദയാത്രയ്ക്ക് എത്തിയ വിദ്യാര്‍ഥികളാണ് അപകടത്തില്‍പ്പെട്ടത്. 50 അംഗ സംഘത്തില്‍ വായ്‌രി കടപ്പുറത്ത് കുളിക്കാനിറങ്ങിയവര്‍ മുങ്ങുകയായിരുന്നു. മറ്റു മൂന്നുപേരെ രക്ഷപ്പെടുത്തിയെങ്കിലും എട്ടു പേരെ രക്ഷിക്കാനായില്ല.

കടലിലേക്ക് പ്രവേശിക്കരുതെന്ന് ശക്തമായ മുന്നറിയിപ്പു നല്‍കിയെങ്കിലും അവഗണിച്ചതാണ് അപകടത്തിലെത്തിച്ചതെന്ന് പൊലിസ് പറഞ്ഞു. മീന്‍ പിടുത്തക്കാരാണ് രക്ഷാപ്രവര്‍ത്തനത്തിന് നേതൃത്വം നല്‍കിയത്.

മരിച്ചവരില്‍ രണ്ടു പെണ്‍കുട്ടികളും പെടും. രക്ഷപ്പെടുത്തിയ വിദ്യാര്‍ഥികളില്‍ ഒരാളുടെ നില അതീവ ഗുരുതരമായി തുടരുകയാണ്.