ലണ്ടന്‍: പ്രീമിയര്‍ ലീഗ് മത്സരങ്ങള്‍ മൂന്നാഴ്ചകള്‍ക്കുള്ളില്‍ പുനരാരംഭിക്കണമെന്ന നിബന്ധനയ്ക്ക് പ്രീമിയര്‍ ലീഗ് ക്ലബ്ബുകള്‍ സമ്മതം മൂളി. കഴിഞ്ഞ മാര്‍ച്ച് മാസത്തിന്റെ തുടക്കത്തില്‍ താല്‍ക്കാലികമായി നിര്‍ത്തിവച്ച ലീഗ് പുനരാരംഭിച്ചിരുന്നില്ല.
ജൂണ്‍ 17ന രണ്ട് മത്സരങ്ങളോടെയായിരിക്കും ലീഗ് പുനരാരംഭിക്കുകയെന്നാണ് റിപ്പോര്‍ട്ടുകള്‍. അന്ന് മാഞ്ചസ്റ്റര്‍ സിറ്റി- ആഴ്‌സനല്‍ തമ്മിലുള്ള കടുത്ത പോരിനൊപ്പം ആസ്റ്റണ്‍ വില്ലയും ഷെഫീല്‍ഡ് യുനൈറ്റഡും ഏറ്റുമുട്ടും.
ലീഗ് മത്സരം ലക്ഷ്യംവച്ച് കഴിഞ്ഞ ദിവസങ്ങളിലായി ചുരുക്കം ചില ടീമുകള്‍ ചെറു ഗ്രൂപ്പുകളായി പരിശീലനത്തിനിറങ്ങിയിരുന്നു. പരിശീലന പ്രോട്ടോക്കോളും യു.കെ സര്‍ക്കാരിന്റെ നിര്‍ദേശങ്ങളും പാലിച്ച് അടച്ചിട്ട സ്റ്റേഡിയങ്ങളിലായിരുന്നു ഓരോ ടീമിന്റെയും പരിശീലനം.
കൊവിഡ് പശ്ചാത്തലത്തില്‍ ടീമുകളുടെ പരിശീലന ദൃശ്യങ്ങള്‍ പുറത്തുവിട്ടിരുന്നില്ല. എന്നാല്‍ ഇന്നലെ പരിശീലനത്തിനിറങ്ങിയ ന്യൂകാസില്‍ ടീം തങ്ങളുടെ ചിത്രങ്ങള്‍ പുറത്തുവിട്ടു. പരിശീലന ചിത്രം പുറത്തു വിടുന്ന ആദ്യ ടീമാണ് ന്യൂകാസില്‍.
നിലവില്‍ 82 പോയിന്റുമായി ലിവര്‍പൂളാണ് പോയിന്റ് പട്ടികയില്‍ ഒന്നാമത്. 57 പോയിന്റുമായി മാഞ്ചസ്റ്റര്‍ സിറ്റിയും 53 പോയിന്റുമായി ലെസ്റ്റര്‍ സിറ്റിയും യഥാക്രമം രണ്ടും മൂന്നും സ്ഥാനങ്ങളിലുണ്ട്.