കുമ്പള: കുമ്പളയില്‍ വന്‍ മദ്യവേട്ട. കാറില്‍ കടത്തി കൊണ്ടുപോവുകയായിരുന്ന 430 പാക്കറ്റ് കര്‍ണാടക നിര്‍മിത മദ്യം കുമ്പള പൊലിസ് സാഹസികമായി പിടികൂടി.
കര്‍ണാടകയില്‍നിന്ന് കാറില്‍ മദ്യം കടത്തി കൊണ്ടുവരുന്നുണ്ടെന്ന രഹസ്യവിവരത്തിന്റെ അടിസ്ഥാനത്തില്‍ കുമ്പള സ്റ്റേഷന്‍ ഹൗസ് ഓഫിസര്‍ കെ. പ്രേംസദനും സംഘവുമാണ് കിലോമീറ്ററുകള്‍ താണ്ടി കുമ്പളയില്‍വച്ച് മദ്യം പിടികൂടിയത്. എന്നാല്‍ രണ്ട് പ്രതികള്‍ കാര്‍ ഉപേക്ഷിച്ച് ഓടി രക്ഷപ്പെട്ടു.
പൊലിസിനെ കണ്ടതിനെ തുടര്‍ന്ന് ദേശീയപാതയില്‍ നിന്ന് ആരിക്കാടി ബംബ്രാണ വഴി കഞ്ചിക്കട്ട വഴി പോവുകയും പിന്നീട് പൊലിസ് പാലത്തിനു കുറുകെ വാഹനം നിര്‍ത്തി തടസം സൃഷ്ടിച്ചതിനാല്‍ രക്ഷയില്ലെന്ന് മനസിലാക്കിയ പ്രതികള്‍ കാര്‍ ഉപേക്ഷിച്ച് കടന്നു കളയുകയായിരുന്നു. പ്രതികളെ കുറിച്ച് സൂചന ലഭിച്ചതായി പൊലിസ് പറഞ്ഞു.
കെ.എല്‍ 14 വി. 7846 മാരുതി ആള്‍ട്ടോ കാറാണ് ഉപേക്ഷിച്ചത്. ഇത് വ്യാജ നമ്പറാണെന്ന് പൊലിസ് പറഞ്ഞു. സംഘത്തില്‍ അഡീഷണല്‍ എസ്.ഐ ശിവദാസന്‍, സിവില്‍ പൊലിസ് ഓഫിസര്‍ പ്രതീഷ് ഗോപാല്‍, ബാബു പാറമ്മേല്‍ എന്നിവരും ഉണ്ടായിരുന്നു.