തിരുവനന്തപുരം: തെരഞ്ഞെടുപ്പില്‍ ശബരിമല മുഖ്യപ്രചാരണ വിഷയം ആക്കണമെന്ന് ആര്‍.എസ്.എസ്. തെരഞ്ഞെടുപ്പില്‍ ശബരിമല മുഖ്യ പ്രചാരണ വിഷയമാക്കിയാല്‍ ബി.ജെ.പിക്ക് വിജയം ഉണ്ടാകുമെന്നാണ് ആര്‍.എസ്.എസിന്റെ നിലപാട്.

കൊച്ചിയില്‍ നടന്ന ആര്‍.എസ്.എസ് സമന്വയ ബൈഠക്കാണ് ശബരിമല വിഷയത്തില്‍ തീരുമാനമെടുത്തത്. ബി.ജെ.പി, ആര്‍.എസ്.എസ്, ഹിന്ദു ഐക്യവേദി തുടങ്ങിയ സംഘടനകളിലെ നേതാക്കളാണ് ബൈഠക്കില്‍ പങ്കെടുത്തത്. ശബരിമലയിലെ സ്ത്രീ പ്രവേശനം ചര്‍ച്ച ചെയ്താല്‍ വിശ്വാസികളെ ഒപ്പം നിര്‍ത്താമെന്നും എല്ലാ ബി.ജെ.പി സ്ഥാനാര്‍ഥികളും പ്രത്യേകം ശ്രദ്ധിക്കണമെന്നും ആര്‍.എസ്.എസ് നിര്‍ദേശം നല്‍കി.

ശബരിമല സ്ത്രീ പ്രവേശനത്തിലൂടെ വിശ്വാസികളുടെ വിശ്വാസത്തിനു മേലാണ് സര്‍ക്കാര്‍ കടന്നുകയറിയതെന്നും കടുത്ത മനുഷ്യാവകാശ ലംഘനമാണ് അവിടെ നടന്നതെന്നും പ്രധാനമായും ചൂണ്ടിക്കാണിക്കണമെന്നും നിര്‍ദേശം നല്‍കിയിട്ടുണ്ട്. ശബരിമല വിഷയം ബി.ജെ.പിക്ക് വലിയ മേല്‍ക്കൈ നല്‍കുമെന്നാണ് യോഗത്തിലുണ്ടായ വിലയിരുത്തല്‍.

നിയോജകമണ്ഡലതലത്തില്‍ ആര്‍.എസ്.എസ്, ബി.ജെ.പി നേതാക്കള്‍ ഉള്‍പ്പെടുന്ന സമന്വയ സമിതികള്‍ രൂപീകരിക്കും. ആര്‍.എസ്.എസിന്റെ മുഴുവന്‍ പ്രചാരകരും തെരഞ്ഞെടുപ്പ് രംഗത്തുണ്ടാവും. ഹിന്ദു ഐക്യവേദി, ശബരിമല കര്‍മസമിതി നേതാക്കളെയും പ്രചാരണരംഗത്ത് ഉപയോഗിക്കാനും തീരുമാനമായി. കൂടാതെ തിരുവനന്തപുരം, പത്തനംതിട്ട, കോട്ടയം, തൃശൂര്‍ എന്നീ മണ്ഡലങ്ങളുടെ പൂര്‍ണ ചുമതല ആര്‍.എസ്.എസിന്റെ മുഖ്യ പ്രചാരകര്‍ക്ക് നല്‍കി.

ഇതിനിടെ, സ്ഥാനാര്‍ഥി നിര്‍ണയവുമായി ബന്ധപ്പെട്ട് ഉയര്‍ന്ന തര്‍ക്കങ്ങളില്‍ ആര്‍.എസ്.എസ് നേതാക്കള്‍ യോഗത്തില്‍ അതൃപ്തി അറിയിച്ചു. പത്തനംതിട്ടയില്‍ സ്ഥാനാര്‍ഥിയായി കെ. സുരേന്ദ്രനെ നേരത്തെ തന്നെ നിശ്ചയിച്ചിരുന്നതാണെന്നും പിന്നീടുണ്ടായ തര്‍ക്കം അനാവശ്യമാണെന്നുമായിരുന്നു വിമര്‍ശനം.