കോഴിക്കോട്: കൊവിഡിന്റെ പശ്ചാത്തലത്തില്‍ പഠനം ഓണ്‍ലൈനിലേക്ക് മാറ്റുമ്പോള്‍ ഉണ്ടാകുന്ന പ്രശ്‌നങ്ങള്‍ പരിഹരിക്കാന്‍ വിദ്യാഭ്യാസ വകുപ്പ് തയാറാകണമെന്ന് എം.എസ്.എഫ് സംസ്ഥാന പ്രസിഡന്റ് പി.കെ നവാസ്, ജനറല്‍ സെക്രട്ടറി ലത്തീഫ് തുറയൂര്‍ എന്നിവര്‍ വാര്‍ത്താസമ്മേളനത്തില്‍ ആവശ്യപ്പെട്ടു. ടെക്‌നോളജിയിലെ അപര്യാപ്തത കാരണവും മതിയായ നെറ്റ്‌വര്‍ക് സംവിധാനം ഇല്ലാത്തതിന്റെ പേരിലും മൂന്നു ലക്ഷത്തോളം വിദ്യാര്‍ഥികള്‍ക്ക് ഓണ്‍ലൈന്‍ പഠനം നഷ്ടമാകും. വിദ്യാര്‍ഥി സംഘടനകളുമായും വിദ്യാഭ്യാസ വിചക്ഷണരുമായും ചര്‍ച്ച ചെയ്യാതെയുള്ള ഏകപക്ഷീയമായ പരിഷ്‌കാരങ്ങള്‍ക്കെതിരേ എം.എസ്.എഫ് ശക്തമായ പ്രക്ഷോഭം സംഘടിപ്പിക്കും. 

നാളെ സംസ്ഥാനത്തെ എല്ലാ വിദ്യാഭ്യാസ ഓഫിസുകളിലേക്കും മാര്‍ച്ച് നടത്തും. കോളജുകളിലെ അധ്യയനസമയം മാറ്റുന്നത് പ്രതികൂലമായി ബാധിക്കും. കൂടിയാലോചന കൂടാതെ കോളജ് സമയമാറ്റം ഉള്‍പ്പെടെയുള്ള വിഷയങ്ങളില്‍ മുന്നോട്ടുപോയാല്‍ കൊവിഡ് പ്രോട്ടോകോള്‍ ലംഘിച്ച് പ്രക്ഷോഭം നടത്താന്‍ എം.എസ്.എഫ് നിര്‍ബന്ധിതമാകുമെന്ന് ഭാരവാഹികള്‍ അറിയിച്ചു. വാര്‍ത്താസമ്മേളനത്തില്‍ എം.എസ്.എഫ് ട്രഷറര്‍ സി.കെ നജാഫ്, വൈസ് പ്രസിഡന്റ് ശറഫുദ്ദീന്‍ പിലാക്കല്‍, സെക്രട്ടറിമാരായ കെ.ടി റഊഫ്, അഷര്‍ പെരുമുക്ക്, കോഴിക്കോട് ജില്ലാ പ്രസിഡന്റ് അഫ്‌നാസ് ചോറോട് സംബന്ധിച്ചു.