കൊണ്ടോട്ടി: കേരളത്തിലെ മാപ്പിള സംസ്‌കാരവും പാരമ്പര്യവും അടുത്തറിയാനും ലോകത്തിന് മുമ്പില്‍ അവതരിപ്പിക്കാനും മലേഷ്യയില്‍ നിന്നുമെത്തിയ സംഘം മോയിന്‍കുട്ടി വൈദ്യര്‍ അക്കാദമി സന്ദര്‍ശിച്ചു. മലേഷ്യയിലെ ആസ്‌ട്രോ വാനവില്‍ ചാനല്‍ പ്രവര്‍ത്തകരാണ് അക്കാദമി സന്ദര്‍ച്ചത്.
ചാനല്‍ എഡിറ്റര്‍ ഫിദാവുല്ലാഖാന്‍, ഡയറക്ടര്‍ ദുരൈ, അസി. ഡയറക്ടര്‍മാരായ ദേവേന്ദ്ര,  സൈദ് അലി, ആങ്കര്‍ മൊഹ്‌സിന്‍ എന്നിവരാണ് സംഘത്തിലുള്ളത്. ഈദുല്‍ഫിത്വറിനുള്ള പ്രത്യേക പരിപാടിയായ നമ്പിക്കൈ പെരുമാള്‍ ഡോക്യുമെന്ററി  ചിത്രീകരണവുമായാണ് സംഘം എത്തിയത്. അക്കാദമി ജോ. സെക്രട്ടറി കെ.കെ മുഹമ്മദ് അബ്ദുല്‍ സത്താറിന്റെ നേതൃത്വത്തില്‍ സംഘത്തെ സ്വീകരിച്ചു. അക്കാദമിയിലെ അറബി മലയാളം ലൈബ്രറിയിലും ഗാലറിയിലും ചിത്രീകരണം നടത്തി.ചെമ്മാട് ദാറുല്‍ഹുദാ ഇസ്‌ലാമിക് യൂനിവേഴ്‌സിറ്റി, പാലക്കാട് കോട്ട, കൊടുങ്ങല്ലൂര്‍ ചേരമാന്‍ പെരുമാള്‍ പള്ളി, മുക്കം ഓര്‍ഫനേജ് തുടങ്ങിയ സ്ഥലങ്ങളും സംഘം സന്ദര്‍ശിച്ചു ചിത്രീകരണം നടത്തിയിട്ടുണ്ട്.