ന്യൂഡല്‍ഹി: കൊവിഡ് വ്യാപനത്തില്‍ തബ്‌ലീഗ് ജമാഅത്തുകാര്‍ക്കെതിരായ വിദ്വേഷ പ്രചാരണം തുടരുന്നു. തബ്‌ലീഗ് ജമാഅത്തുകാര്‍ വന്നതോടെയാണ് ഗുജറാത്തില്‍ കൊവിഡ് വ്യാപനം രൂക്ഷമായതെന്ന് മുഖ്യമന്ത്രി വിജയ് രൂപാണി പ്രതികരിച്ചു. ദ പ്രിന്റിന് നല്‍കിയ അഭിമുഖത്തിലാണ് രൂപാണിയുടെ പ്രതികരണം. കൊവിഡിന്റെ പേരില്‍ മുസ്‌ലിം സമൂഹം വേട്ടയാടപ്പെടുന്നതിനെ കുറിച്ച് ചോദിച്ചപ്പോഴായിരുന്നു ഈ പ്രതികരണം.

'കൊവിഡ് സംസ്ഥാനത്ത് എത്തിയതിന് ശേഷം ജാതിക്കും മതത്തിനും അപ്പുറം ജനങ്ങളുടെ സുരക്ഷ ഉറപ്പാക്കലായിരുന്നു ഞങ്ങളുടെ പ്രധാന ലക്ഷ്യം. അതേസമയം, തബ്‌ലീഗ് ജമാഅത്തുകാര്‍ പ്രവേശിക്കുന്നത് വരെ സംസ്ഥാനത്ത് കൊവിഡ് ഇങ്ങനെ പടര്‍ന്നു പിടിച്ചിട്ടില്ലായിരുന്നു'- രൂപാണി പറഞ്ഞു.

'ജമാഅത്തില്‍ പങ്കെടുത്ത ആലുകള്‍ സംസ്ഥാനത്ത് പ്രവേശിച്ചതോടെ കൊവിഡ് ഒരു കാട്ടു തീ പോലെ പടര്‍ന്നു. ഡാറ്റ ഇതിന് തെളിവായുണ്ട്. കൊവിഡ് ബാധിതരുടെ ട്രാവല്‍ ഹിസ്റ്ററി പരിശോധിച്ചപ്പോഴാണ് ഏറ്റവും കൂടുതല്‍ കേസുകള്‍ ജമാഅത്തില്‍ പങ്കെടുത്തവരില്‍ നിന്നുള്ളതാണെന്ന് മനസ്സിലായത്. മാത്രമല്ല, ബഹുഭൂരിഭാഗം തബ്‌ലീഗ് പ്രവര്‍ത്തകരും അവരുടെ ട്രാവല്‍ ഹിസ്റ്ററി നല്‍കാന്‍ വിസമ്മതിച്ചു. അവര്‍ സര്‍ക്കാറിനോട് സഹകരിച്ചില്ല. അതിനാല്‍ ഞങ്ങള്‍ക്ക് അവര്‍ക്കെതിരെ നിയമ നടപടി കൊക്കൊള്ളേണ്ടി വന്നു'- രൂപാണി കൂട്ടിച്ചേര്‍ത്തു.

അഹമദാബാദ് നഗരത്തില്‍ മാത്രം 11,000 കേസുകളാണ് റിപ്പോര്‍ട്ട് ചെയ്യപ്പെട്ടത്. 760 മരണങ്ങളും ഇവിടെ റിപ്പോര്‍ട്ട് ചെയ്തു. ഇതില്‍ 75 ശതമാനവും തബ്‌ലീഗ് പ്രവര്‍ത്തകരില്‍ നിന്ന് പടര്‍ന്നതാണെന്നാണ് രൂപാണി വാദിക്കുന്നത്. എന്നാല്‍ ഇത് ന്യൂനപക്ഷങ്ങളെ വേട്ടയാടാനായി ഉപയോഗിക്കില്ലെന്നും അദ്ദേഹം ആവര്‍ത്തിക്കുന്നു.