ശ്രീനഗര്‍: ജമ്മു കശ്മിരിലെ മൂന്ന് ജില്ലകളില്‍ നടന്ന ഏറ്റമുട്ടലില്‍ അഞ്ച് ഭീകരരെ സൈന്യം വധിച്ചു. കൊല്ലപ്പെട്ട രണ്ടുപേര്‍ ജെയ്‌ഷെ ഭീകര സംഘാംഗങ്ങളാണ്.
ഉത്തര കശ്മിരിലെ ബാരാമുള്ളയിലുണ്ടായ ഏറ്റുമുട്ടലിലാണ് രണ്ടു ഭീകരരെ കൊലപ്പെടുത്തിയത്. മറ്റു രണ്ടുപേരെ ഉത്തര ബന്ദിപ്പോറയിലെ ഹാജിനിലും ഒരാളെ ഷോപ്പിയാനിലും വച്ചാണ് കൊലപ്പെടുത്തിയത്.
വ്യാഴാഴ്ച രാവിലെ 10നാണ് ഹാജിനില്‍ ഏറ്റുമുട്ടലുണ്ടായത്. രാഷ്ട്രീയ റൈഫില്‍, സി.ആര്‍.പി.എഫ്, ജമ്മു കശ്മിര്‍ പൊലിസിലെ സ്‌പെഷല്‍ ഓപറേഷന്‍ വിഭാഗം എന്നിവര്‍ സംയുക്തമായാണ് ഭീകരരെ പിടികൂടാനായി സൈനിക നടപടി തുടങ്ങിയത്. തുടര്‍ന്ന് ഇവിടെ വച്ച് ഒരു ഭീകരനെ കൊലപ്പെടുത്തി. തുടര്‍ന്നാണ് മറ്റിടങ്ങളിലും ഭീകര സാന്നിധ്യമുണ്ടെന്ന് തിരിച്ചറിഞ്ഞ് സൈനിക നടപടി തുടങ്ങിയത്.
ഭീകരരില്‍ ഒരാള്‍ പാക് വംശജനാണ്. കൊല്ലപ്പെട്ട ഭീകരരില്‍നിന്ന് നിരവധി സ്‌ഫോടക വസ്തുക്കളും എ.കെ 47 തോക്കുകളും പിടികൂടിയിട്ടുണ്ട്.