ന്യൂഡല്‍ഹി: മുത്വലാഖ് ചൊല്ലുന്നവര്‍ക്ക് മൂന്ന് വര്‍ഷം ജയില്‍ ശിക്ഷ ചുമത്തിക്കൊണ്ട് കേന്ദ്ര സര്‍ക്കാര്‍ പുറപ്പെടുവിച്ച മുത്വലാഖ് രണ്ടാം ഓര്‍ഡിനന്‍സിനെതിരേ സമസ്ത കേരള ജംഇയ്യത്തുല്‍ ഉലമയുടെ ഹരജി സുപ്രിംകോടതി ഇന്ന് പരിഗണിക്കും.

ചീഫ് ജസ്റ്റിസ് രഞ്ജന്‍ ഗൊഗോയിയുടെ നേതൃത്വത്തിലുള്ള മൂന്നംഗ ബെഞ്ചാണ് ഹരജി പരിഗണിക്കുക. സമസ്തക്കുവേണ്ടി പ്രാഥമിക വാദത്തിന് സുപ്രിംകോടതി അഭിഭാഷകന്‍ സുല്‍ഫിക്കര്‍ അലി പി.എസ്, മുഹമ്മദ് ത്വയ്യിബ് ഹുദവി എന്നിവര്‍ ഹാജരാകും. മുത്വലാഖ് രണ്ടാം ഓര്‍ഡിനന്‍സ് ലംഘിക്കുന്ന മുസ്‌ലിം മൗലികാവകാശങ്ങളെക്കുറിച്ച് സുപ്രിംകോടതി മുന്‍പാകെ വിശദമായി കാര്യങ്ങള്‍ ബോധിപ്പിക്കും.

കോടതി വാദം കേള്‍ക്കാന്‍ തയാറാകുകയും സമസ്തയുടെ ഹരജി ഫയലില്‍ സ്വീകരിച്ച് കേന്ദ്ര സര്‍ക്കാരിന് നോട്ടിസ് അയക്കുകയും ചെയ്യുന്ന പക്ഷം ദുഷ്യന്ത് ദവെ, സല്‍മാന്‍ ഖുര്‍ഷിദ് തുടങ്ങിയ സീനിയര്‍ അഭിഭാഷകരും സമസ്തക്കുവേണ്ടി ഹാജരാകും. മുത്വലാഖ് കേസ് അടക്കം നാലുകേസുകളാണ് സമസ്ത സുപ്രിംകോടതിയില്‍ നടത്തുന്നത്.