ബംഗളൂരു: കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി വയനാട് മണ്ഡലത്തില്‍ മത്സരിക്കുമെന്ന വാര്‍ത്ത ശക്തമായിരിക്കേ ദക്ഷിണേന്ത്യയിലേക്ക് കണ്ണെറിഞ്ഞ് പ്രധാനമന്ത്രി നരേന്ദ്ര മോദിയും. കര്‍ണാടകയിലെ ബംഗളൂരു സൗത്ത് മണ്ഡലത്തില്‍ മോദി മത്സരിക്കുമെന്നാണ് പുറത്തു വരുന്ന വിവരം. ഇവിടെ കോണ്‍ഗ്രസ് 20 സീറ്റുകളിലാണ് മത്സരിക്കുന്നത്.

ദക്ഷിണേന്ത്യയില്‍ രാഹുല്‍ മത്സരിക്കാന്‍ എത്തിയാല്‍ അത് കോണ്‍ഗ്രസിന് വലിയ മുതല്‍ക്കൂട്ടാകുമെന്ന കണക്കുകൂട്ടലിലാണ് ബി.ജെ.പി നേതൃത്വം മോദിയേയും ഇവിടേക്ക് കൊണ്ടുവരാന്‍ നീക്കം തുടങ്ങിയതെന്നാണ് വിവരം. എന്നാല്‍ രാഹുലിന്റെ വരവുപോലെ മോദിയുടെ വരവും പാര്‍ട്ടി നേതൃത്വം ഇതുവരെ പ്രഖ്യാപിച്ചിട്ടില്ല. 1991 മുതല്‍ ബി.ജെ.പിക്കൊപ്പം നില്‍ക്കുന്ന മണ്ഡലമാണ് ബംഗളൂരു സൗത്ത്. അതേസമയം ഈ മണ്ഡലത്തില്‍ ഒരു സര്‍പ്രൈസ് സ്ഥാനാര്‍ഥിയെ കോണ്ടുവരുമെന്നും ഇവിടെ ബി.ജെ.പിയിലെ ആര് വരുമെന്ന് നോക്കിയശേഷമായിരിക്കും ഹൈക്കമാന്‍ഡ് തീരുമാനമെന്നുമുള്ള നിലപാടിലാണ് സംസ്ഥാന കോണ്‍ഗ്രസ് നേതൃത്വം.

1996 മുതല്‍ കേന്ദ്ര മന്ത്രി അനന്ത്കുമാറാണ് ഈ മണ്ഡലത്തെ പ്രതിനിധീകരിക്കുന്നത്. കഴിഞ്ഞ നവംബറിലാണ് അദ്ദേഹം മരിച്ചത്. തന്നെ പാര്‍ട്ടി പരിഗണിക്കുമെന്ന പ്രതീക്ഷയില്‍ അനന്തകുമാറിന്റെ വിധവ തേജസ്വിനി അനന്തകുമാര്‍ ഇവിടെ തെരഞ്ഞെടുപ്പ് കമ്മിറ്റി ഓഫിസ് തുറന്ന് പ്രവര്‍ത്തനം തുടങ്ങിയിട്ടുണ്ട്.

അതേസമയം, പ്രധാനമന്ത്രി മോദി ഇവിടെ മത്സരിക്കുന്നതുമായി ബന്ധപ്പെട്ട വിവരങ്ങളൊന്നും ലഭിച്ചിട്ടില്ലെന്നാണ് കര്‍ണാടക ബി.ജെ.പി നേതാക്കള്‍ പറയുന്നത്. മോദി എത്തിയേക്കുമെന്ന വിവരത്തെ തുടര്‍ന്ന് സുരക്ഷ കര്‍ശനമാക്കിയതായി പൊലിസ് അറിയിച്ചു.