തളിപ്പറമ്പ്: സാമൂഹ്യവിരുദ്ധരെക്കൊണ്ട് പൊറുതിമുട്ടിയ തളിപ്പറമ്പ് ടൗണ്‍സ്‌ക്വയര്‍ അടച്ചുപൂട്ടി. തളിപ്പറമ്പ് ബസ്സ്റ്റാന്റിന് സമീപം പൊതുയോഗങ്ങളും മറ്റ് പരിപാടികളും നടത്തുന്നതിനായി നഗരസഭ സ്ഥാപിച്ച ടൗണ്‍സ്‌ക്വയര്‍ സാമൂഹ്യവിരുദ്ധരുടെ കേന്ദ്രമായി മാറിയിരുന്നു. പരസ്യമദ്യപാനവും കഞ്ചാവ് വില്‍പ്പനയും വര്‍ധിക്കുകയും സാമൂഹ്യ വിരുദ്ധരുടെ ഏറ്റുമുട്ടലുകളേറുകയും ചെയ്തതിനെ തുടര്‍ന്ന് നിരവധി തവണ നാട്ടുകാര്‍ പൊലിസിലും നഗരസഭയിലും പരാതി നല്‍കിയിരുന്നു. മാധ്യമങ്ങളും പ്രശ്‌നത്തില്‍ സജീവമായി ഇടപെട്ടതിനെ തുടര്‍ന്നാണ് ഇന്നലെ ടൗണ്‍സ്‌ക്വയറിന്റെ കവാടത്തില്‍ കൂറ്റന്‍ ഗേറ്റ് സ്ഥാപിച്ചത്. പരിപാടികളില്ലാത്ത സമയത്ത് ടൗണ്‍സ്‌ക്വയര്‍ പൂര്‍ണമായി അടച്ചിടാനാണ് തീരുമാനമെന്ന് നഗരസഭാ അധികൃതര്‍ പറഞ്ഞു.