താഷ്‌കന്റ്: രണ്ടാം മത്സരത്തിലും പരാജയപ്പെട്ട ഇന്ത്യക്ക് അണ്ടര്‍ 23 ഏഷ്യന്‍ കപ്പ് ഫുട്‌ബോളിന് യോഗ്യത നേടാനായില്ല. ഇന്നലെ നടന്ന മത്സരത്തില്‍ താജിക്കിസ്താനോട് എതിരില്ലാത്ത രണ്ട് ഗോളിന് പരാജയപ്പെട്ടായിരുന്നു ഇന്ത്യ യോഗ്യത ലഭിക്കാതെ പുറത്തായത്. 

ആദ്യ മത്സരത്തില്‍ കസാഖിസ്താനോട് എതിരില്ലാത്ത മൂന്ന് ഗോളുകള്‍ക്ക് ഇന്ത്യ പരാജയപ്പെട്ടിരുന്നു. ആദ്യ പരാജയത്തോടെ തന്നെ ഇന്ത്യയുടെ പ്രതീക്ഷകള്‍ അസ്തമിച്ചിരുന്നു. എന്നാല്‍ രണ്ടാം മത്സരത്തില്‍ മികച്ച മാര്‍ജിനില്‍ ജയിച്ച് മികച്ച നാല് രണ്ടാം സ്ഥാനക്കാരില്‍ ഉള്‍പ്പെട്ട് യോഗ്യത നേടാനായിരുന്നു ഇന്ത്യയുടെ പദ്ധതി. എന്നാല്‍ പദ്ധതി എട്ടു നിലയില്‍ പൊട്ടുകയായിരുന്നു. ഡെറിക് പെരേര പരിശീലിപ്പിച്ച് കളത്തിലിറങ്ങിയ ടീമിന്റെ പ്രകടനം ആവറേജിലും താഴ്ന്ന നിലയിലായിരുന്നു.

രണ്ട് മത്സരങ്ങളിലും മികച്ചതെന്ന് പറയാന്‍ ഒന്നുമില്ലാതെയാണ് ഇന്ത്യ കസാകിസ്താനില്‍ നിന്ന് മടങ്ങുന്നത്. രണ്ട് മത്സരങ്ങളിലും ഒറ്റ ഗോള്‍ പോലും അടിക്കാതെയാണ് ഇന്ത്യ മടങ്ങുന്നത്. രണ്ടു മത്സരങ്ങളിലുമായി ഇന്ത്യക്ക് ഗോള്‍ നേടുന്നതിന് രണ്ട് സുവര്‍ണാവസരങ്ങള്‍ ലഭിച്ചെങ്കിലും അവസരം മുതലാക്കാന്‍ ഇന്ത്യന്‍ മുന്നേറ്റനിരക്കായില്ല. ഇന്ത്യയുടെ ഗ്രൂപ്പില്‍ നിന്ന് ഉസ്‌ബെക്കിസ്താന്‍ ഒന്നാം സ്ഥാനക്കാരായി ഫിനിഷ് ചെയ്തു. ഇന്ത്യയുടെ ഗ്രൂപ്പിലുണ്ടായിരുന്ന പാകിസ്താന്‍ നേരത്തെ യോഗ്യതാ മത്സരത്തില്‍നിന്ന് പിന്മാറിയിരുന്നു.