ദോഹ: മൂന്നു വര്‍ഷത്തോളമായി തുടരുന്ന ഖത്തര്‍ ഉപരോധം പിന്‍വലിക്കാന്‍ സൗദി അറേബ്യക്കും യു.എ.ഇക്കും മേല്‍ സമ്മര്‍ദവുമായി യു.എസ് പ്രസിഡന്റ് ഡൊണാള്‍ഡ് ട്രംപ്. ഖത്തര്‍ എയര്‍ലൈന്‍സിന് വ്യോമപാത വിലക്കിയത് ഒഴിവാക്കാന്‍ ട്രംപ് നേരിട്ട് ഇരു രാജ്യങ്ങള്‍ക്കും മേല്‍ സമ്മര്‍ദം ചെലുത്തുന്നതായാണ് റിപ്പോര്‍ട്ട്. 

സൗദിയും യു.എ.ഇയും വ്യോമപാത വിലക്കിയതുകാരണം ഖത്തര്‍ എയര്‍ലൈന്‍സ് വിദേശ രാജ്യങ്ങളിലേക്ക് സര്‍വിസ് നടത്താന്‍ ഇറാന്‍ വ്യോമപാതയാണ് ഉപയോഗിക്കുന്നത്. ഇതിന് ഖത്തര്‍ ഫീസ് അടക്കുന്നുണ്ട്.  ഇത് ഇറാന് നേട്ടമാവുന്ന സാഹചര്യത്തിലാണ് ട്രംപിന്റെ ഇടപെടല്‍. ഖത്തറിനു മേലുള്ള ഉപരോധം പിന്‍വലിക്കാന്‍ ട്രംപ് നേരത്തെയും സഊദി കിരീടാവകാശി മുഹമ്മദ് ബിന്‍സല്‍മാനോട് ആവശ്യപ്പെട്ടിരുന്നു. 

2017 ജൂണ്‍ അഞ്ചിനാണ് സഊദി അറേബ്യ, യു.എ.ഇ, ബഹ്‌റൈന്‍ അടക്കമുള്ള രാജ്യങ്ങള്‍ ഖത്തറിനു മേല്‍ ഉപരോധം ഏര്‍പ്പെടുത്തിയത്. അതേസമയം സഊദി അടക്കമുള്ള അയല്‍ രാജ്യങ്ങളുടെ ഉപരോധത്തെ ഖത്തര്‍ വിജയകരമായി അതിജീവിച്ചതായി വിദഗ്ധര്‍ വിലയിരുത്തി. സമീപ ഭാവിയില്‍ ഖത്തര്‍ ജി.സി.സിയില്‍നിന്നു പുറത്തുപോയാലും അത്ഭുതപ്പെടേണ്ടതില്ലെന്ന് നിരീക്ഷകര്‍ അഭിപ്രായപ്പെട്ടു.