സുല്‍ത്താന്‍ ബത്തേരി: ജില്ലയില്‍ നിരന്തരമായി കടുവയും പുലിയും ജനവാസ കേന്ദ്രത്തില്‍ ഇറങ്ങി വളര്‍ത്തുമൃഗങ്ങളെയും മനുഷ്യരെയും ആക്രമിക്കുന്നത് പതിവാകുന്ന സാഹചര്യത്തില്‍ കൂടുവച്ചും മയക്കു വെടിവച്ചും പിടികൂടുന്നവയ്ക്ക് വയനാട് വന്യജീവി സങ്കേതം കേന്ദ്രീകരിച്ച് പുനരധിവാസ സങ്കേതം വേണമെന്ന് ആവശ്യം. പിടികൂടുന്ന ഇവയെ ഒന്നുകില്‍ തൃശൂരിലോ തിരുവനന്തപുരത്തോ ആണ് കൊണ്ടുപോകുന്നത്. എന്നാല്‍ നിരന്തരമായി ഈ സ്ഥലങ്ങളിലേക്ക് കടുവ, പുലി അടക്കമുള്ള മൃഗങ്ങള്‍ എത്തുന്നത് ഇവിടെയും ഉള്‍ക്കൊള്ളാന്‍ സാധിക്കുന്നില്ല. അതിനാല്‍ വയനാട്ടില്‍ ജനവാസകേന്ദ്രങ്ങളില്‍ ഇറങ്ങുകയും പിടികൂടപ്പെടുകയും ചെയ്യുന്ന ഇത്തരം മൃഗങ്ങളെ വനത്തിനുള്ളില്‍ പ്രത്യേക സംവിധാനമൊരുക്കി പാര്‍പ്പിക്കുവാനാണ് നാട്ടുകാരുടെ ആവശ്യം. ഇതിനായി കാടിനുള്ളില്‍ പൂര്‍ണ വന്യാവസ്ഥയില്‍ വന്യജീവി പുനരധിവാസ കേന്ദ്രം ആരംഭിക്കണം. ഇതിനായി 50 ഏക്കര്‍ വനം മതിയാകും. ഇതിനായി ഉപയോഗിക്കുന്ന വനഭൂമിക്ക് ചുറ്റും മൃഗങ്ങള്‍ പുറത്തുകടക്കാതിരിക്കാനുള്ള കിടങ്ങുകളും വേലികളും സ്ഥാപിക്കണം. കൂടാതെ ഇവയക്കുള്ള ഭക്ഷണസൗകര്യവും ഒരുക്കേണ്ടതുണ്ട്. ഇത്തരത്തിലുള്ള പുനരധിവാസ കേന്ദ്രം ഒരുക്കിയാല്‍ അത് വിനോദസഞ്ചാര മേഖലക്കും ഉണര്‍വേകും. പക്ഷേ ഇതിന് സെന്റര്‍ സൂ ഓഫ് അതോറിറ്റിയുടെ അനുമതിവേണം. ഇതിനായി വനംവകുപ്പ് ശ്രമിക്കണമെന്നാണ് ആവശ്യമുയരുന്നത്.