നെടുമങ്ങാട്: വേനല്‍ കടുത്തതോടെ മലയോര മേഖലയിലെ അങ്കണവാടി കുരുന്നുകള്‍ പ്രയാസത്തില്‍. വൈദ്യുതിയെത്താത്ത അങ്കണവാടികളില്‍ വേനല്‍ച്ചൂടേറ്റ് കുട്ടികള്‍ തളര്‍ന്നുറങ്ങുന്നത് പതിവാണെന്ന് ടീച്ചര്‍മാര്‍ പറയുന്നു.
രാവിലെ അങ്കണവാടികളില്‍ എത്തുന്ന കുട്ടികള്‍ വൈകുന്നേരമാകുമ്പോഴേക്കും ചൂട് താങ്ങാന്‍ കഴിയാതെ ക്ഷീണിക്കുന്നതായും ഇവര്‍ പറയുന്നു.
മലയോര മേഖലകളില്‍ അടിസ്ഥാന സൗകര്യങ്ങളില്ലാതെ പ്രവര്‍ത്തിക്കുന്ന അങ്കണവാടികളില്‍ വേനല്‍ച്ചൂടിനെ പ്രതിരോധിക്കാന്‍ സംവിധാനങ്ങളില്ല. ചുട്ടുപൊള്ളുന്ന വേനലില്‍ പ്രവര്‍ത്തനസമയം ക്രമീകരിച്ചെങ്കിലും കുട്ടികളുടെ അവസ്ഥയില്‍ കാര്യമായ മാറ്റങ്ങളൊന്നുമില്ലെന്നും ആക്ഷേപമുണ്ട്. മലയോര മേഖലകളിലെ ഒട്ടുമിക്ക അങ്കണവാടികളും വാടകകെട്ടിടങ്ങളിലാണു പ്രവര്‍ത്തിക്കുന്നത്. ഇതില്‍ ഷീറ്റുമേഞ്ഞ കെട്ടിടങ്ങളുമുണ്ട്. ചിലയിടങ്ങളില്‍ വൈദ്യുതിയില്ലാത്തതിനാല്‍ ഫാനോ മറ്റുപകരണങ്ങളോ പ്രവര്‍ത്തിപ്പിക്കാന്‍ കഴിയുന്നില്ല. ചിലയിടങ്ങളില്‍ ആവശ്യത്തിന് കാറ്റുപോലും പ്രവേശിക്കാത്ത കെട്ടിടങ്ങളിലാണു അങ്കണവാടികള്‍ പ്രവര്‍ത്തിക്കുന്നത്.