തൊടുപുഴ: സംസ്ഥാനത്ത് മണ്‍സൂണ്‍ അഞ്ചു ദിവസം പിന്നിടുമ്പോള്‍ 108 ശതമാനം അധിക മഴ ലഭിച്ചെങ്കിലും അണക്കെട്ടുകളിലെ ജലനിരപ്പ് ഉയരുന്നില്ല. വൃഷ്ടിപ്രദേശങ്ങളില്‍ ശരാശരിയിലും താഴെയാണ് മഴ ലഭിച്ചെതെന്നതിനാലാണ് നീരൊഴുക്ക് ശക്തിപ്പെടാത്തത്. അണക്കെട്ടുകള്‍ കുറവുള്ള വടക്കന്‍ ജില്ലകളിലാണ് കൂടുതല്‍ മഴ ലഭിച്ചത്. ജൂണ്‍ ഒന്നിന് 1076.252 ദശലക്ഷം യൂനിറ്റ് വൈദ്യുതി ഉല്‍പാദിപ്പിക്കാനുള്ള വെള്ളം എല്ലാം സംഭരണികളിലുമായി ഉണ്ടായിരുന്നു. ഇന്നലെ രാവിലത്തെ കണക്കുപ്രകാരം 1040.905 ദശലക്ഷം യൂനിറ്റിനുള്ള വെള്ളമാണുള്ളത്. ജൂണ്‍ ഒന്നു മുതല്‍ അഞ്ചുവരെ വൈദ്യുതി ബോര്‍ഡ് ലോഡ് ഡെസ്പാച്ച് സെന്റര്‍ പ്രതീക്ഷിച്ചിരുന്ന നീരൊഴുക്ക് 84.3 ദശലക്ഷം യൂനിറ്റ് വൈദ്യുതിക്കുള്ളതാണ്. എന്നാല്‍ ലഭിച്ചതാകട്ടെ 17.57 ദശലക്ഷം യൂനിറ്റ് മാത്രം. 843 ദശലക്ഷം യൂനിറ്റ് വൈദ്യുതിക്കുള്ള നീരൊഴുക്കാണ് ജൂണ്‍ മാസത്തില്‍ കെ.എസ്.ഇ.ബി പ്രതീക്ഷിക്കുന്നത്.
കൂടുതല്‍ മഴ ലഭിച്ചത് കോഴിക്കോട് ജില്ലയിലാണ് 32 സെ.മീ. കണ്ണൂര്‍-23, പത്തനംതിട്ട-10.51, തിരുവനന്തപുരം-17.87, ആലപ്പുഴ-10.6, മലപ്പുറം- 7.51, എറണാകുളം-7, തൃശൂര്‍-6.2, വയനാട്- 5.45, കൊല്ലം-5.11, ഇടുക്കി - 4.82, പാലക്കാട് 2.28 സെ.മീ. മഴയാണ് ലഭിച്ചത്. ഇടുക്കി 0.72 സെ.മീ, പമ്പ 3.3, കക്കി 1.8, ഷോളയാര്‍ 1.5, ഇടമലയാര്‍ 1.74, കുണ്ടള 0.16, മാട്ടുപ്പെട്ടി 0.6, കുറ്റ്യാടി 2.7, തര്യോട് 1.9, പൊന്മുടി 0.5 സെ.മീ എന്നിങ്ങനെയാണ് ഇന്നലെ രാവിലെ ഏഴിന് അവസാനിച്ച 24 മണിക്കൂറില്‍ വിവിധ പദ്ധതി പ്രദേശങ്ങളില്‍ പെയ്ത മഴയുടെ കണക്ക്.
6.01 ദശലക്ഷം യൂനിറ്റ് വൈദ്യുതിക്കുള്ള വെള്ളമാണ് ഇന്നലെ അണക്കെട്ടുകളില്‍ ഒഴുകിയെത്തിയത്. സംഭരണശേഷിയുടെ 25 ശതമാനം വെള്ളമാണ് എല്ലാ അണക്കെട്ടുകളിലുമായി നിലവിലുള്ളത്. 66 ദശലക്ഷം യൂനിറ്റായിരുന്നു ഇന്നലെ സംസ്ഥാനത്തെ വൈദ്യുതി ഉപഭോഗം. ഇതില്‍ 48.63 ദശലക്ഷം യൂനിറ്റ് പുറത്തുനിന്നു എത്തിച്ചു. 17.37 ദശലക്ഷം യൂനിറ്റായിരുന്നു ആഭ്യന്തര ഉല്‍പാദനം. ഇതില്‍ പകുതിയില്‍ അധികവും ഉല്‍പാദിപ്പിച്ചത് ഇടുക്കി പദ്ധതിയിലാണ്, 9.582 ദശലക്ഷം യൂനിറ്റ്.
ജൂണ്‍ ഒന്നിന് തന്നെ തെക്കുപടിഞ്ഞാറന്‍ കാലവര്‍ഷം എത്തുന്നതിനും മഴ ശക്തമാകാനുമുള്ള പ്രധാന കാരണം നിസര്‍ഗ ചുഴലിക്കാറ്റാണ്.
മഹാരാഷ്ട്ര-മധ്യപ്രദേശ് അതിര്‍ത്തിയിലെത്തിയ ന്യൂനമര്‍ദത്തിന്റെ ശക്തി കുറഞ്ഞതിനാല്‍ വരും ദിവസങ്ങളില്‍ മഴ കൂടാനുള്ള സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പിന്റെ നിഗമനം.