ചെര്‍ക്കള: എതിര്‍ത്തോടില്‍ വീട്ടമ്മയെ കെട്ടിയിട്ട് സ്വര്‍ണം കവര്‍ന്നു. കഴിഞ്ഞ ദിവസം വൈകിട്ടോടെയാണ് വിദ്യാനഗര്‍ പൊലിസ് സ്റ്റേഷന്‍ പരിധിയിലെ ചെര്‍ക്കള എതിര്‍ത്തോട് കുണ്ടോളം മൂല ബദര്‍ നഗറിലെ മുഹമ്മദ് കുഞ്ഞിയുടെ ഭാര്യ സുഹറ (40) കവര്‍ച്ചക്ക് ഇരയായത്.
സംഭവത്തില്‍ വിദ്യാനഗര്‍ എസ്.ഐ അനുപ്കുമാറിന്റെ നേതൃത്വത്തിലുള്ള പൊലിസ് സംഘം അന്വേഷണം തുടങ്ങി. സമീപ പ്രദേശത്തെ സി.സി ടി.വി ദ്യശ്യങ്ങള്‍ പൊലിസ് പരിശോധിച്ചു. വൈകിട്ട് അഞ്ചോടെ സുഹറ വീടുപൂട്ടി സമീപത്തെ ഭര്‍തൃ സഹോദരി ആയിശയുടെ വീട്ടില്‍ പോയതായിരുന്നു. 6.15 ഓടെ തിരിച്ചുവന്ന് വീടിന്റെ വാതില്‍ തുറന്ന് അകത്ത് കയറാന്‍ ശ്രമിക്കുന്നതിനിടെ ഹെല്‍മറ്റ് ധരിച്ചെത്തിയ ആള്‍ സുഹ്‌റയെ കെട്ടിയിട്ട് ആഭരണങ്ങള്‍ കവരുകയായിരുന്നു.
വീട്ടിലെത്തിയ മകള്‍ സെറിനയും ഭര്‍ത്താവ് ഹനീഫയുമാണ് കൈകാലുകള്‍ ബന്ധിച്ച നിലയില്‍ സുഹറയെ വീടിനകത്ത് കണ്ടത്. ഉടന്‍ തന്നെ ഇവരെ കാസര്‍കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചു. വിവരമറിഞ്ഞ് ജില്ലാ പൊലിസ് മേധാവി ഡോ. എ. ശ്രിനിവാസ് ഉള്‍പ്പെടെയുള്ളവര്‍ സ്ഥലത്തെത്തി.