പള്ളിക്കല്‍: ദേശീയപാതയില്‍ കാറിടിച്ച് പിതാവിനും മകള്‍ക്കും പരുക്കേറ്റു. ചേലേമ്പ്ര പൈങ്ങോട്ടുമാട് സ്വദേശി മുസ്തഫ (45), മകള്‍ ഫസ്മിത ഹന്ന (10) എന്നിവര്‍ക്കാണ് പരുക്കേറ്റത്. ഫസ്മിത ഹന്നയുടെ പരുക്ക് ഗുരുതരമാണെന്നാണ് വിവരം. ദേശീയപാത കാക്കഞ്ചേരിക്കടുത്ത് പതിമൂന്നാം മൈലില്‍ ഇന്നലെ രാവിലെ എട്ടോടെയായിരുന്നു സംഭവം. രണ്ട് പേരും റോഡ് മുറിച്ചു കടക്കവേ അമിത വേഗതയിലെത്തിയ കാര്‍ ഇവരെ ഇടിച്ചു തെറിപ്പിക്കുകയായിരുന്നു. ഇവരെ ഇടിച്ച ശേഷം റോഡരികിലുള്ള മരത്തിലിടിച്ചാണ് കാര്‍ നിന്നത്. കാര്‍ ഭാഗികമായി തകര്‍ന്നു.
പരുക്കേറ്റവരെ ആദ്യം ചേളാരിയിലെ സ്വകാര്യ ആശുപത്രിയിലും പരുക്ക് ഗുരുതരമായതിനാല്‍ പിന്നീട് കോഴിക്കോട് മെഡിക്കല്‍ കോളജ് ആശുപത്രിയിലും പ്രവേശിപ്പിക്കുകയായിരുന്നു. നെടുമ്പാശ്ശേരി വിമാനത്താവളത്തില്‍നിന്ന് കാസര്‍കോട്ടേക്ക് പോവുകയായിരുന്ന കാസര്‍കോട് സ്വദേശികളുടെ കാറാണ് അപകടത്തിനിടയാക്കിയത്.