കോഴിക്കോട്: വിരരോഗം നിര്‍മാര്‍ജനം ചെയ്യുന്നതിനായി ദേശീയ തലത്തില്‍ ഓഗസ്റ്റ് 10നു നടത്തുന്ന ഡീവേമിങ് ദിനാചരണത്തിന്റെ ഭാഗമായി ജില്ലയിലെ ഒന്നു മുതല്‍ 19 വരെ വയസു പ്രായമുള്ളവര്‍ക്ക് ആല്‍ബെന്റസോള്‍ ഗുളിക നല്‍കും.
സ്വകാര്യ സ്‌കൂളുകള്‍ ഉള്‍പ്പെടെയുള്ള വിദ്യാഭ്യാസ സ്ഥാപനങ്ങള്‍, അങ്കണവാടികള്‍, ആരോഗ്യ കേന്ദ്രങ്ങള്‍ എന്നിവ കേന്ദ്രീകരിച്ചാണു ഗുളിക നല്‍കുക. ഇതിനായി ആരോഗ്യ പ്രവര്‍ത്തകര്‍, അധ്യാപികമാര്‍, ആശാവര്‍ക്കര്‍മാര്‍, കുടുംബശ്രീ പ്രവര്‍ത്തകര്‍ എന്നിവര്‍ക്കു പരിശീലനം നല്‍കും.
മണ്ണിലൂടെ പകരുന്ന വിരരോഗം തടയുകയെന്ന ലക്ഷ്യത്തോടെയാണു ദേശീയതലത്തില്‍ ഡിവേമിങ് ദിനാചരണം സംഘടിപ്പിക്കുന്നത്. വിരരോഗം കാരണമുണ്ടാവുന്ന വിളര്‍ച്ച, വളര്‍ച്ചക്കുറവ് തുടങ്ങിയ പ്രശ്‌നങ്ങളെ പ്രതിരോധിക്കുന്നതിനു വേണ്ടിയാണിത്. ഓഗസ്റ്റ് 10നു വിദ്യാലയങ്ങളിലെത്തുന്ന കുട്ടികള്‍ക്ക് ഉച്ചഭക്ഷണത്തിനു ശേഷമാണു ഗുളിക നല്‍കുക. അന്ന് ക്ലാസില്‍ ഹാജരാവാത്ത കുട്ടികള്‍ക്ക് ഓഗസ്റ്റ് 16നു നടക്കുന്ന മോപ്പപ്പ് റൗണ്ടില്‍ മരുന്നു നല്‍കും.
ഇതുമായി ബന്ധപ്പെട്ട് കലക്ടറേറ്റില്‍ ചേര്‍ന്ന യോഗത്തില്‍ ഡെപ്യൂട്ടി കലക്ടര്‍ (ഡി.എം) അബ്ദുന്നാസര്‍ ബി. അധ്യക്ഷനായി. ഡി.എം.ഒ ഡോ. ആര്‍.എല്‍ സരിത, ഡി.എം.ഒ ഹോമിയോപ്പതി ഡോ. കവിതാ പുരുഷോത്തമന്‍, ജില്ലാ പഞ്ചായത്ത് സെക്രട്ടറി പാര്‍ഥസാരഥി, ഐ.എം.എ പ്രതിനിധി ഡോ. അജിത് ഭാസ്‌കര്‍, ഐ.എ.പി സെക്രട്ടറി ഡോ. കൃഷ്ണ മോഹന്‍, ഹയര്‍ സെക്കന്‍ഡറി ഡി.ഡി കെ. ഗോകുല്‍ കൃഷ്ണന്‍ പങ്കെടുത്തു.