തിരുവനന്തപുരം: വന്‍ തിരിച്ചടി നേരിട്ടുകൊണ്ടിരിക്കുന്ന സാഹചര്യത്തില്‍ ബെവ് ക്യൂ ആപ്പിനെതിരേ കണ്‍സ്യൂമര്‍ഫെഡും രംഗത്ത്. ആപ്പുമായി മുന്നോട്ടു പോകാനാകില്ലെന്ന് കാണിച്ച് കണ്‍സ്യൂമര്‍ ഫെഡ് സര്‍ക്കാരിന് കത്ത് നല്‍കി. മദ്യക്കടകളില്‍ നിന്നുള്ള വരുമാനത്തിലാണ് ത്രിവേണിയടക്കമുള്ള കണ്‍സ്യൂമര്‍ ഫെഡ് സ്ഥാപനങ്ങള്‍ പ്രവര്‍ത്തിക്കുന്നത്. ശരാശരി ആറു കോടിയുടേതായിരുന്നു കണ്‍സ്യൂമര്‍ ഫെഡ് ഔട്ട്‌ലെറ്റുകളില്‍ നിന്നുള്ള ഒരു ദിവസത്തെ മദ്യവില്പന. എന്നാല്‍ ലോക്ക് ഡൗണിനു ശേഷം തുറന്നപ്പോള്‍ ഇത് രണ്ടരക്കോടിയായി കുറഞ്ഞു. കണ്‍സ്യൂമര്‍ഫെഡ് നടത്തുന്ന മിക്ക ഷോപ്പുകള്‍ക്കും പ്രതിദിനം 400 ടോക്കണുകള്‍ പോലും ലഭിക്കുന്നില്ല. എട്ടു ദിവസത്തെ വില്‍പനയിലൂടെ കണ്‍സ്യൂമര്‍ഫെഡിന് ലഭിച്ചത് 21 കോടി 42 ലക്ഷം രൂപയാണ്. നേരത്തേയുള്ള വില്‍പനയുമായി താരതമ്യം ചെയ്താല്‍ കുറഞ്ഞത് 48 കോടി ലഭിക്കേണ്ട സ്ഥാനത്താണിത്. ആപ്പ് ഇങ്ങനെ തുടര്‍ന്നാല്‍ മദ്യശാലകള്‍ പൂട്ടേണ്ടിവരുമെന്ന് ബെവ്‌കോയും നേരത്തെ സര്‍ക്കാരിനെ അറിയിച്ചിരുന്നു.
ആപ്പ് പിന്‍വലിക്കണമെന്ന ആവശ്യവുമായി ബെവ്‌കോയിലെ ഭരണപ്രതിപക്ഷ യൂനിയനുകള്‍ സര്‍ക്കാരിനെ സമീപിച്ചിട്ടുണ്ട്.