കാട്ടിക്കുളം: കടുവ പോത്തുകുട്ടിയെ കൊന്നു. കാട്ടിക്കുളം പനവല്ലി ചെറിയമ്മിടി സി.കെ സുരേഷിന്റെ പോത്തുകുട്ടിയെയാണ് കടുവ കൊന്നത്. തിങ്കളാഴ്ച വൈകിട്ട് അഞ്ചോടെ വീടിനടുത്തുള്ള തോട്ടത്തില്‍ വച്ചാണ് കടുവയുടെ ആക്രമണമുണ്ടായത്. പോത്തുകുട്ടികള്‍ തോട്ടത്തില്‍ മേഞ്ഞു കൊണ്ടിരിക്കുമ്പോഴാണ് കടുവ അക്രമിച്ചത്.
സുരേഷിന്റെ മാതാവ് തായമ്മ നോക്കി നില്‍ക്കെയാണ് കടുവ പോത്തുകുട്ടിയെ പിടിച്ചത്. ഇവരുടെ നിലവിളികേട്ട് നാട്ടുകാര്‍ എത്തിയപ്പോഴേക്കും പോത്തിനെ കടുവ കൊന്നിരുന്നു.
വിവരമറിഞ്ഞ് വനംവകുപ്പ് അധികൃതര്‍ സ്ഥലത്തത്തി. അരിവാള്‍ രോഗിയായ സുരേഷ് പിന്നാക്ക വിഭാഗ വികസന വകുപ്പ് അരിവാള്‍ രോഗികള്‍ക്കായി നടപ്പിലാക്കിയ സ്വയംതൊഴില്‍ ധനസഹായ പദ്ധതിയുടെ ഭാഗമായിട്ടാണ് പോത്ത് കുട്ടികളെ വളര്‍ത്തുന്നത്.
ഈ പദ്ധതി പ്രകാരം തൊഴുത്ത് നിര്‍മിച്ച് രണ്ട് പോത്ത്കുട്ടികളെ വളര്‍ത്തുകയായിരുന്നു. രണ്ട് വയസ് പ്രായമുള്ള പോത്തുകുട്ടിയെയാണ് കടുവ കൊന്നത്. പനവല്ലി പ്രദേശത്ത് കടുവ ശല്യം രൂക്ഷമാണ്. രണ്ടാഴ്ച്ച മുന്‍പ് പനവല്ലിയില്‍ പശുവിനെ കടുവ ആക്രമിച്ച് കൊന്നിരുന്നു.