പൊന്നാനി: അടച്ചുപൂട്ടിയ കള്ളുഷാപ്പ് വീണ്ടും തുറക്കാനുള്ള ശ്രമത്തിനെതിരേ പ്രതിഷേധത്തിന് തയാറെടുക്കുകയാണ് പ്രദേശവാസികള്‍. കടവനാട് വാരിയത്ത് റോഡിലുള്ള ഏഴുവര്‍ഷങ്ങള്‍ക്ക് മുന്‍പ് അടച്ചുപൂട്ടിയ കള്ള് ഷാപ്പാണ് തൊഴിലാളി കമ്മിറ്റി മുഖേന തുറക്കാന്‍ ശ്രമം നടത്തുന്നത്.
ഷാപ്പിന്റെ 400 മീറ്ററിനകത്ത് ആരാധാനാലയങ്ങള്‍ ഉണ്ടങ്കില്‍ ലൈസന്‍സ് അനുവദിക്കില്ലെന്നിരിക്കെ 200 മീറ്റര്‍ അകലെ മാത്രം പൊതു ക്ഷേത്രം നിലനില്‍ക്കുന്നുണ്ടന്നും ഇത് മറികടന്നാണ് ഷാപ്പ് അനുവദിക്കാന്‍ ശ്രമം നടത്തുന്നതെന്നും പ്രദേശവാസികള്‍ പറയുന്നു.
നിരവധി ജനങ്ങള്‍ തിങ്ങിപ്പാര്‍ക്കുന്ന പ്രദേശമാണിത്. ജനകീയ എതിര്‍പ്പിനെ തുടര്‍ന്ന് അവസാനിച്ച ഷാപ്പ് നടത്താന്‍ ആളില്ലാത്തതിനെ അടച്ചതായിരുന്നു. ശ്രമത്തിനെതിരേ ജനങ്ങള്‍ ഒപ്പിട്ട നിവേദനത്തോടെ ജില്ലാ കലക്ടര്‍ക്കും പരാതി നല്‍കിയിട്ടുണ്ട്. കടവനാട് ഷാപ്പുവരുന്നതിനെതിരേ പൊന്നാനി നഗരസഭ പ്രമേയം പാസാക്കിയിരുന്നു. 20-ാം വാര്‍ഡ് കൗണ്‍സിലര്‍ കെ.എ അനില്‍കുമാര്‍ അവതരിപ്പിച്ച പ്രമേയം ഒരംഗം ഒഴിവെ മുഴുവന്‍ അംഗങ്ങളും അംഗീകരിക്കുകയായിരുന്നു.
അതേസമയം കടവനാട് കള്ള് ഷാപ്പ് അനുവദിക്കാനുള്ള ഒരു നടപടിയും എക്‌സൈസ് വകുപ്പ് എടുത്തില്ലെന്ന് സിഐ രമേഷ് പറഞ്ഞു.അപേക്ഷയില്‍ വിശദാന്വേഷണം നടത്തി പൊതുക്ഷേത്രമാണന്ന് ബോധ്യപ്പെട്ടാല്‍ ലൈസന്‍സ് അനുവദിക്കാനാവില്ലെന്നും അദ്ദേഹം പറഞ്ഞു.