പൊന്നാനി: ജില്ലയുടെ തീരദേശമേഖലകളില്‍ കടലാക്രമണം രൂക്ഷമായി തുടരുന്നു. കഴിഞ്ഞ ദിവസം രാത്രിയിലാണ് കടല്‍ക്ഷോഭം രൂക്ഷമായത്. ഏകദേശം അരകിലോമീറ്റര്‍ കര കടലെടുത്ത് കഴിഞ്ഞു.
അജ്മീര്‍ നഗറിലാണ് ഇത്തവണ കടല്‍ക്ഷോഭം ഏറ്റവും കൂടുതല്‍ നാശം വിതച്ചത്. അജ്മീര്‍ നഗര്‍ റോഡ് ഇന്നില്ല. ഇതിനോടകം തീരത്തെ അരകിലോമീറ്ററിലധികം ഭൂമിയാണ്  കടലാക്രമണത്തില്‍ ഇല്ലാതായത്. കടലിനെ ഭയന്ന് ഉറങ്ങിയിട്ട് ദിവസങ്ങളോളമായെന്ന് പ്രദേശവാസികളും പറയുന്നു.
കടല്‍ക്ഷോഭം ശക്തമായ കഴിഞ്ഞ മൂന്നു ദിവസത്തിനിടെ 12 സെന്റ് ഭൂമിയാണ് പടിഞ്ഞാറകത്ത് മമ്മു എന്നയാള്‍ക്ക് മാത്രം നഷ്ടമായത്. ഏത് നിമിഷവും കടലെടുത്തേക്കാമെന്ന അവസ്ഥയിലാണ് മമ്മുവിന്റെ വീട്. കടല്‍ഭിത്തി എന്ന ഏക പരിഹാരമാണ് വര്‍ഷങ്ങളായി അജ്മീര്‍ നഗര്‍ തീരദേശവാസികള്‍ ആവശ്യപ്പെടുന്നത്. കഴിഞ്ഞ സര്‍ക്കാര്‍ കടല്‍ഭിത്തിക്കായി 18 കോടി രൂപ അനുവദിച്ചിരുന്നെങ്കിലും നിര്‍മാണം ഇനിയും ആരംഭിച്ചിട്ടില്ല. ഈ സര്‍ക്കാര്‍ അധികാരത്തില്‍ വന്നശേഷം 3.2 കോടി രൂപ കടല്‍ദിത്തി നിര്‍മാണത്തിന് അനുവദിച്ചെന്ന് കഴിഞ്ഞ ദിവസം കടലാക്രമണ ബാധിത പ്രദേശങ്ങള്‍  സന്ദര്‍ശിച്ച സ്പീക്കര്‍ വ്യക്തമാക്കിയിരുന്നു. വെളിയങ്കോട് ,പാലപ്പെട്ടി മേഖലകളില്‍ കടല്‍ഭിത്തിയില്ലാത്തതാണ് കടലാക്രമണം രൂക്ഷമാക്കാന്‍ ഇടയാക്കിയത്.