തളിപ്പറമ്പ്: തിരുവട്ടൂര്‍ മഖാം ഉറൂസ് ഏപ്രില്‍ മൂന്നു മുതല്‍ ഏഴുവരെ നടത്തും. മൂന്നിനു രാവിലെ ഒന്‍പതിന് തിരുവട്ടൂര്‍ മുസ്‌ലിം ജമാഅത്ത് കമ്മിറ്റി അഡൈ്വസര്‍ പി.എം കുഞ്ഞബ്ദുല്ല പതാക ഉയര്‍ത്തും. രാത്രി ഏഴിന് പാണക്കാട് മുനവ്വറലി ശിഹാബ് തങ്ങള്‍ ഉദ്ഘാടനം ചെയ്യും. തുടര്‍ന്ന് അസ്‌ലം അസ്ഹരി പൊയ്ത്തുംകടവ് പ്രഭാഷണം നടത്തും. നാലിനു രാത്രി ഏഴിന് ഖത്തം ദുആയ്ക്കു കോട്ടൂര്‍ കുഞ്ഞാമു മുസ്‌ലിയാര്‍ നേതൃത്വം നല്‍കും. ഒന്‍പതിന് ഇ.പി ഹംസത്ത് സഅദിയുടെ പ്രഭാഷണവും പത്തിന് ബുര്‍ദ ഖവാലിയും അരങ്ങേറും.
അഞ്ചിനു രാത്രി ഏഴിന് മജ്‌ലിസുന്നൂറിനു മുഹമ്മദ്‌കോയ തങ്ങള്‍ ജമലുല്ലൈലി നേതൃത്വം നല്‍കും. ഒന്‍പതിന് കാസര്‍കോട് മുഹമ്മദ് ഷാക്കിര്‍ ദാരിമിയുടെ പ്രഭാഷണം. ആറിനു രാവിലെ ഒന്‍പതിന് വിദ്യാര്‍ഥികള്‍ക്കുള്ള ഉപരിപഠന മാര്‍ഗ നിര്‍ദേശക ക്യാംപും രാത്രി ഒന്‍പതിന് മുനീര്‍ ഹുദവി വിളയിലിന്റെ പ്രഭാഷണവും നടക്കും. ഏഴിനു രാവിലെ 11ന് മൗലീദ് പാരായണവും രാത്രി ഏഴിന് ഉമര്‍ നദ്‌വി തോട്ടീക്കലിന്റെ പ്രഭാഷണവും ഒന്‍പതിന് മുഹമ്മദ് ഷാഫി പൂക്കോയ തങ്ങള്‍ അല്‍ ഹൈദ്രോസിയുടെ നേതൃത്വത്തില്‍ അനുഗ്രഹ പ്രഭാഷണവും കൂട്ടപ്രാര്‍ഥനയും നടക്കും. ഏഴിന് ഉച്ചയ്ക്ക് അന്നദാനവും ഉണ്ടാകുമെന്നു ഭാരവാഹികളായ ടി.സി അബ്ദുല്‍ ഖാദര്‍ മൗലവി, ടി.കെ മുഹമ്മദ് കുഞ്ഞി, സി.ടി അബ്ദുല്‍ഖാദര്‍, ടി.പി അബ്ദുല്‍ കരീം എന്നിവര്‍ വാര്‍ത്താസമ്മേളനത്തില്‍ അറിയിച്ചു.