കോഴിക്കോട്: കോര്‍പറേഷന്‍ കുടുംബശ്രീ സി.ഡി.എസ്, യൂനിറ്റി ഗ്രൂപ്പിന്റെ നേതൃത്വത്തില്‍ കോഴിക്കോട്-വയനാട് റോഡില്‍ ഫാത്തിമ ആശുപത്രിക്കു എതിര്‍വശം ആരംഭിക്കുന്ന സ്ത്രീസൗഹൃദ മഹിളാമാളില്‍ കുടുംബശ്രീ മൈക്രോ ബസാര്‍ ആരംഭിക്കുന്നു. സംസ്ഥാനത്ത ആദ്യത്തെ മൈക്രോ ബസാര്‍ ആണിത്.
ഷോപ്പുകളില്‍ വലിയ വാടക നല്‍കാന്‍ കഴിയാതെ സ്വഭവനങ്ങളില്‍വച്ച് നിര്‍മിക്കപ്പെടുന്ന ചെറുകിട ഉല്‍പന്നങ്ങള്‍ക്കു വിപണിയൊരുക്കുകയാണ് ബസാറിന്റെ പ്രധാന ലക്ഷ്യം. മാളിനോടു ചേര്‍ന്ന തറനില ഇതിനായി പ്രത്യേകം സംവിധാനിക്കും. 30 സംരംഭകര്‍ക്കാണ് ഇതിനായി മാളില്‍ ആദ്യം അവസരം നല്‍കുക. കുടുംബശ്രീയില്‍ റജിസ്റ്റര്‍ ചെയ്ത സംരംഭകര്‍ക്കു മാത്രമായി ഒരുക്കുന്ന ബസാറില്‍ ഓരോ സംരംഭകര്‍ക്കും പ്രത്യേക ഔട്ട്‌ലെറ്റുകള്‍ സ്ഥാപിച്ചുനല്‍കും. സൗജന്യ നിരക്കിലാണ് കൗണ്ടര്‍ അനുവദിക്കുന്നത്.
ഉല്‍പന്നങ്ങളുടെ വൈവിധ്യവും ഗുണനിലവാരവും വിലനിലവാരവും ഉറപ്പുവരുത്തിയാകും സംരംഭകരെ തിരഞ്ഞെടുക്കുക. കോര്‍പറേഷന്‍ സി.ഡി.എസിനു കീഴിലെ സംരംഭങ്ങളെ കൂടാതെ ജില്ലയിലെ മികച്ച മറ്റു സംരംഭങ്ങളെയും ഇതിലേക്കായി പരിഗണിക്കും. സംരംഭകരെ തിരഞ്ഞെടുക്കുന്നതിനായി ഇന്നു രാവിലെ 11ന് കുംടുംബശ്രീ ഹാളില്‍ യോഗം ചേരും. താല്‍പര്യമുള്ള എല്ലാ സംരംഭകര്‍ക്കും യോഗത്തില്‍ പങ്കെടുക്കാം.
അടുത്ത ഓണം മുതല്‍ കുടുംബശ്രീയുടെ മഹിളാ മാള്‍ പ്രവര്‍ത്തനമാരംഭിക്കും. സ്ത്രീകള്‍ക്ക് സ്വയം പര്യാപ്തത ഉറപ്പുവരുത്താനുള്ള പദ്ധതിയാണിത്. മാളിന്റെ എല്ലാ പ്രവര്‍ത്തനങ്ങളും നിയന്ത്രിക്കുന്നതും സംഘാടകരുമെല്ലാം സ്ത്രീകളാകും. കുടുംബശ്രീയുടെ വിപണി വിപുലമാക്കുന്നകയാണ് പ്രധാന ലക്ഷ്യം.